Den un carta di 5 november, cu Premier Evelyn Wever-Croes a dirigi na sindicatonan, a duna un splicacion di aspectonan financiero y a contesta nan carta den cual nan a pidi un reunion pa papia tocante recobra e cortamento di 12.6% y pa papia tocante indexering.
“Desde inicio di e gobernacion di Gabinete Wever-Croes, e punto di salida ta cu semper ta dispuesto pa ricibi of sinta cu sindicatonan, pasobra ta considera di sumo importancia pa scucha e preocupacionnan di trahadornan y ta atende cu esaki na un forma responsabel. E aña aki mundo henter, y den e caso aki Aruba, a wordo confronta cu un pandemia, unda miles di persona a keda afecta den salud. Otronan mester a entrega un parti di salario y miles di otro a perde trabao y consecuentemente tur entrada. Gobierno mester a tuma medidanan doloroso, pero necesario pa enfrenta e crisis aki.
Pa loke ta trata e posicion huridico di e ambtenaar, manera a informa caba, e prespuesto 2021 ta den proceso, pero e tema specifico aki lo wordo discuti cu Hulanda den e prome kwartaal di 2021, mirando cu esaki ta un di e exigencianan di Hulanda pa Aruba ricibi sosten financiero. Gobierno lo keda den estrecho contacto cu sindicatonan den e periodo aki.
Gobierno ta pidi comprension di tur trahador, en particular di ambtenaar- y otro empleadonan di gobierno pa e situacion critico cu Aruba ta aden, pa solidaridad pa cu esnan cu a perde trabao, pa por fabor duna Gobierno e espacio pa trata e tema aki na e momento propicio”, segun un comunicado di gobierno.
Segun e comunicado, cu esaki Premier Wever-Croes a demostra un biaha mas di tin e interes di e empleadonan publico y di henter comunidad na pecho, y mes momento ta mustra riba e realidad cu ta basa riba palabracionnan haci cu Hulanda, mester a corta den beneficionan di trahadornan.
Aruba ta den e crisis ainda, e crisis no a pasa ainda. Unabes e crisis cuminsa pasa, por tin mihor perspectiva riba ki termino por cumpli cu e peticion di sindicatonan pa por recobra locual a wordo corta riba salario, e comunicado ta finalisa.
