Sindicatonan ta pidi pa bin cu un impuesto di solidaridad. Pero gobierno a splica cu esaki ta perhudica e empleado publico mas cu lo mester paga total mas, cu si solamente corta salario. Tambe e ta den desbentaha di empleadonan di sector priva pasobra si ta un impuesto, nan tambe mester paga.

Solodariteitbelasting na 1985

Aki por haci un comparacion cu 1985/1986.

E tempo ey a introduci 2 medida:

1) corta salario cu 8.5% (esey ta loke a haci awor tambe na 12.6%). Esaki tabata e tempo ey (y awor tambe) solamente pa sector publico pasobra gobierno su entrada a baha y mester a baha su gasto. Aruba awor ta para na e mesun situacion awor tambe y mester baha gasto.

2) bin cu solidariteitsbelasting di 8.2%. Esaki e tempo ey a conta pa tur hende, den sector publico y sector priva.

Gobierno no a bin cu esaki awor ainda pasobra e ora mester cobra di esnan den sector priva tambe cu ya a perde 40% te cu 100% di nan entrada y awor ta hayando loonsubsidie. Gobierno kier purba evita esaki mas tanto posibel y lo sigui haci tur esfuerso pa no mester bin cu un solidariteitsheffing tambe, segun a wordo informa na lidernan sindical diaranson ultimo.

Empleo publico lo bay paga mas.
Si sindicatonan kier bin cu solidariteitsheffing enbes di baha salario, e trahado publico ta entrega mas. Empleadonan publico mester contribui netto mas hopi. Of haya menos entrada cu awo nan a haya. Pasobra si baha salario, e primanan AOV AZV APFA y loonbelasting tambe ta baha pa e trahado.

Si bay pa un solidariteitsheffing, e primanan y belasting ta keda igual y e ta paga 12.6% na e heffing. Pues netto e empleado lo contribui mas hopi of haya menos entrada cu awo nan a haya.

Ademas, e suma cu Gobierno ta spaar cu e rebaho di salario, mester yega 90 miyon. Si e bira un solidariteitsheffing, mester aumenta e % di 12.6 pasobra den e forma di calcula ey e ‘werkgeversbijdragen’ di gobierno na AOV, AZV y APFA ta keda mes halto. Den e prome scenario di corta salaris, esakinan ta baha tambe pa Gobierno como dunado di trabou (werkgeverslasten) y asina a yega na e 90 miyon.

Si bay pa solidariteitsheffing y pa yega e 90 miyon, e % mester ta mas cu 12.6. Ta duda cu empleadonan lo ta desea esey.

Gobierno mester yega na baha gasto cu 90 miyon florin pasobra simplemente no tin mas placa. Pais Aruba a haya placa presta teniendo cuenta cu ta corta 90 miyon florin. E tristo realidad cu nos mester biba cune. Gobierno lo bolbe splica sindicatonan esaki y, si nan ta insisti pa entrega mas y haya netto menos den nan man, pa mantene un derecho riba pensioen den futuro, Gobierno ta dispuesto pa haci e calculacionnan pa mira cuanto mas cu 12.6% empleadonan mester entrega, y despues tuma un decision. Gobierno a haci tur su esfuerso pa e cortamento ta menos posibel y a tene cuenta cu e scenario aki. Pero si sindicatonan kier entrega mas, ta posibel.