Recientemente den un sala completamente yen a brainstorm con Aruba por crea un economia fuerte y resiliente. ‘Awe nos ta concentra riba economia’ . No solamente pa nos ‘bons’ bek despues di un crisis, pero con nos ta ‘bons’ bay dilanti” Premier Evelyn Wever-Croes a declara na su salida di e simposio ‘Fostering Economic Resilience’ organisa pa Banco Central di Aruba diabierna ultimo.
E tabata un mainta sumamente informativo unda cu diferente expertonan a comparti conocemento tocante e topico importante aki pa nos pais. Institutonan fuerte, maneho pa atende cu retonan di cambio di clima, maneho fiscal y inversion den e capacidad y conocemento di e ser humano tur ta factornan importante pa tin un economia resiliente.
Segun e comunicado cu Bon Dia Aruba a ricibi ta indica cu maneho actual ta tene cuenta cu tur e puntonan aki cu un enfasis riba inversion den e ser humano, innovacion y integridad pa asina nos por yega na un economia resiliente pa no solamente nos generacion actual pero tambe nos futuro generacionnan.
Minister di Finansas y Economia Xiomara Ruiz-Maduro a elabora riba e vision economico 2019-2021 di Gabinete Wever-Croes. “Nos economia ta stagna y na añanan 2015 y 2016 nos a mira un decrecemento economico. Pues un crecemento negativo.
Awor sinembargo nos Economia ta creciendo, y lo sigui crece principalmente debi na e crecemento den turismo, y e vision di nos Gobierno. E aña aki nos ta mira un crecemento economico di 2.4%, y pa otro aña segun rapport di IMF e lo ta 3%, y pa 2021 e crecemento lo ta 3.2%”.
Aruba a score halto den e estudio di resiliencia economico compara cu otro islanan. Nos ta vulnerable door di diversificacion y dependencia di Turismo, pero nos ta trahando riba esey.
Mi ta felicita y gradici Banco Central di Aruba pa organisa e evento aki. Ta solamente ora nos tur alinea nos esfuersonan, nos lo logra cosnan grandi pa nos pais”, Premier Evelyn Wever-Croes a duna di conoce.
