“Tecnologia ta cambiando hopi lihe y e cambionan aki ta trece hopi oportunidad nobo si nos sa di adapta y innova na tempo. Di bay cu e cambio y no keda pega den loke ta mustra awor di ta nos comfort zone. Nos ta un comunidad cu di naturalesa ta hopi creativo y innovativo. Nos imaginacion no conoce limite, un bon ehempel ta nos creatividad den carnival. E ta den nos DNA”, Premier Evelyn Wever-Croes a expresa recientemente den su discurso den e Conferencia di Hende Muhe riba dia internacional di hende muhe.
Segun un comunicado di prensa di gobierno, nos pilar economico principal awor ta e industria turistico, cu a crece danki na nos recursonan natural unico, e cordialidad di nos hendenan y e lama bunita cu ta rondona nos. Pero prosperidad economico di Aruba no semper tabata turismo.
Antes e tabata e industria petrolero, e refineria, cu a duna hopi hende un trabou y perspectiva laboral prometedor. Nos tur ta corda cu e momento cu e refineria a cera su porta a causa cu hopi hende a perde trabou y nos a haya nos den un crisis economico.
Sinembargo ta den e momento di crisis ey nos como Arubianonan a sa di adapta y innova. Danki na e curashi di entrepreneurs local e tempo ey, a logra desaroya un pilar economico nobo den turismo den apenas algun aña y te dia di awe esaki ta un pilar hopi exitoso y prometedor. Esaki ta prueba cu nos tin e habilidad di adapta y innova den tur circumstancia.
Premier Evelyn Wever-Croes: “Nos a logra desaroya nos pilarnan economico exitosamente den pasado, pasobra cada reto nos a enfrenta cu curashi y cu vision. Mescos cu e temponan di insiguridad cu nos a enfrenta ora e refineria a cera na 1985, nos ta enfrentando momentonan di insiguridad similar awor, cu futuro insigur di e refineria, cu menasa contra nos turismo pa e corona virus y nos lo lucha pa desaroya ambos pilar exitosamente, pero mes momento nos mester enfrenta e retonan cu e mesun curashi, cu e mesun habilidad di adapta y innova. Esey lo haci nos como pais hopi mas fuerte”.
