Siman pasa diabierna Prome Minister Evelyn Wever – Croes tabata den Parlamento di Aruba pa trata presupuesto 2023. Na e ocasion Prome Minister a ricibi algun pregunta relaciona cu e tema di Arubahuis cual ta resorta bou di su Ministerio.
Un di e pregunta tabata kico ta e status di e investigacion di Arubahuis. Prome Minister a splica cu actualmente ta den e fase final di e investigacion y alabes wardando riba conseho di kico ta e siguiente pasonan pa tuma. “Na momento cu e investigacion ta afgerond y e consehonan tey di kico ta e pasonan pa tuma, lo pidi presidente di Parlamento pa bin parlamento hunto cu DRH y Central Accountingsdienst pa duna splicacion di exactmente kico a pasa y kico pa haci pa evita cu cosnan asina ta bolbe pasa.” Prome Minister sigura cu ta tratando esaki segun ley ta indica, cu e prioridad maximo cu tin y pa despues presenta esaki na Parlamento.
Un otro pregunta cu Prome Minister a ricibi tocante di Arubahuis ta, cuanto placa a scapa door di ‘merge’ e funcionnan (Minister Plenipotenciario na Den Haag y e funcion di representa Aruba na Union Europeo, ambos carga pa sr. Ady Thijsen). Pa cual Prome Minister a contesta cu ta scapa mas o menos 380 mil florin pa aña. No a kita e placa for di e presupuesto, pa motibo cu lo invertie den profesionalisa Arubahuis, manera cu ta describi den e ‘doelstellingen’ di Arubahuis.
Por ultimo, Prome Minister a contesta e pregunta kico ta haci pa evita cu situacionnan cu ta conduci na investigacion manera na Arubahuis no tuma luga mas. Actualmente tin un Minister encarga cu integridad trahando cu man duro y cu plan strategico pa evita e situacionnan aki ta tuma luga. Sinembargo, e realidad ta cu no por bisa cu e no ta bay pasa mas, pero si e pasa e forma con ta reacciona riba dje ta importante. ‘Ora cu bo hayabo cu un caso di corupcion y bo ta brase, defende y protege manera cu a mira oposicion ta haci, esaki ta hacibo mes of mas corupto.’ Prome Minister a splica sigui splica cu ora a compronde cu tin cosnan cu a sosode na Arubahuis cu mester wordo investiga, mesora a inicia cu e investigacion y ora e ta cla lo bin Parlamento cu e informacion aki. Apart di esaki a tuma diferente otro paso den Arubahuis: tin cambio di personal, a manda personanan di Aruba di Ministerio y di DRH pa mira con e sistema financiero, personal y automatisa ta traha, a introduci cierto maximo pa gastonan asina tin mihor control desde di Aruba (no cu esaki tabata un problema), y a apunta un director interino nobo sra. Glenda Hernandez cu su periodo a pasa, pero a prolonge un poco como cu e ‘werving en selectie’ di director nobo pa Arubahuis ta tardando un poco, Prome Minister a termina bisando.
