Premier Evelyn Wever-Croes y Secretario di Estado Raymond Knops a yega na un acuerdo politico pa sosten di likides pa Aruba bou condicionnan cu a wordo acorda despues di algun luna di negociacion. E acuerdo aki mester wordo aproba diabierna mainta den Conseho di Minister di Reino, y despues ratifica cu firmamento di e acuerdo.
Secretario di Estado Raymond Knops y Prome Minister di Aruba Evelyn Wever-Croes a invita prensa pa un conferencia di prensa virtual, diabierna 13 di november 2020 pa 9.00 (orario di Aruba), despues di e reunion di Conseho di Minister di Reino.
Nan lo duna un conferencia di prensa virtual riba e acuerdo politico entre Aruba y Hulanda riba e di 3 tranche di sosten di likides 2020.
Den e conferencia di prensa e mandatarionan lo firma e acuerdo y lo contesta pregunta di prensa, cu por sigui esaki via Zoom desde sala di prensa di Aruba. E conferencia di prensa ta di 9.00 pa 10.00 am y ta wordo transmiti a traves di TeleAruba, pagina di Facebook di Gabinete Wever-Croes y e canal di Youtube: https://youtu.be/oE5o48yc9Qs.
“Mi no ta bisa pabien ainda pasobra ainda decisionnan mester wordo tuma diabierna ainda. Pero tur cos ta mustra cu nos a keda cla y e acuerdo lo wordo aproba pa Conseho di Minister di Reino. Esaki ta trece e trankilidad cu nos tin mester pa nos cuminsa reconstrui nos pais. Berdad ta cu Covid a benta nos algun stap patras, pero cu e acuerdo aki nos ta bay dal pasonan grandi padilanti pa crea un economia mas fuerte, un autonomia mas fuerte y un Aruba mas fuerte pa brinda mas oportunidad na tur ciudadano di nos pais”, Prome Minister desde Hulanda a duna expresa, segun un comunicado di prensa.
Durante su transito na caminda pa Hulanda, tambe Wever-Croes a reuni brevemente cu prome minister di Corsou, Eugene Rhuggenaath, kende a post un potret di ambos mandatario riba su pagina di Facebook, cu e mensahe: “Un plaser pa topa ku MinPres Evelyn Wever-Croes di Aruba na aeropuerto un rato prome cu su biahe pa Hulanda. Tur cos bon!”, hunto cu emoji di bandera di Corsou, Aruba y Hulanda, y e hashtag ‘#huntu’.
