Durante reunion den Parlamento diahuebs, Minister di Finanzas, Xiomara Maduro a duna di conoce cu Gobierno di Aruba ta den negociacion cu Hulanda. E negociacion aki ta pa haya fiansa cu a wordo pidi desde juli pa e lunanan di juli, augustus y september di e suma di 204 miyon florin.
Segun e comunicado di gobierno aki, siman pasa, Hulanda sin consulta cu Gobierno di Aruba, unilateralmente a cambia e condicionnan y a indica cu e 204 miyon florin lo mester yuda Aruba pa 5 luna. Gobierno di Aruba mesora a informa Hulanda cu esaki no ta posibel pasobra a haci gastonan di juli y augustus cu mester wordo cubri.
Gobierno di Aruba, mirando cu Hulanda a nenga den prome instante pa presta Aruba e placa, a bay busca e placa presta. Minister di Finanzas a informa cu e bononan cu Gobierno di Aruba a emiti tabata exitoso y Gobierno di Aruba ta hayando e fondo pa cubri e dos lunanan necesario.
Hulanda, sinembargo, siman pasa a indica di ta dispuesto pa presta Aruba e placa, pero ta pidi pa Gobierno di Aruba entrega e pronostico di likides te cu fin di e aña aki. Prome Minister Evelyn Wever-Croes a informa Secretario di Estado Knops desde un siman pasa caba cu ya desde e siman anterior esaki a wordo entrega caba na CAFT, segun e comunicado.
“Desde e dia ey Aruba ta wardando riba Hulanda su contesta si di berdad Hulanda ta dispuesto pa presta Aruba e placa aki, mirando cu Hulanda su interes ta 0 porciento. Pero si Hulanda tarda mucho mas, Aruba ta tuma e placa cu a haya riba mercado local pa asina por sigui cumpli cu compromisonan. Esaki a pone cu Aruba tawata tin e posibilidad pa paga salarionan sin problema, pa habri excepcion pa loonsubsidies, y cuminsa traha riba e pagonan di FASE pa luna di september. A pesar di tur dificultad, Gobierno di Aruba ta cumpli cu su compromisonan”, Prome Minister Evelyn Wever-Croes a duna di conoce.
