Prome Minister Evelyn Wever – Croes a reuni cu Embahador di Surinam Rajendre Khargi y Minister Plenipotenciario di Aruba sr. Ady Thijsen. Durante di e reunion a papia con Aruba y Surinam por traha mas miho hunto, y e posibilidad pa yega na acuerdo cu otro riba tereno economico.
Prome Minister Evelyn Wever – Croes a expresa di ta contento di mira cu e relacion fraternal entre e dos paisnan ta na un bon nivel y cu aworaki ta papiando riba con por estrecha e lasonan mas, pa purba tin lasonan economico y comercial entre Surinam y Aruba.
‘Surinam ta pasando den su retonan, pero nan tin potencial economico grandi. Si na Aruba por yega na un of otro tipo di relacion economico comercial cu nan, e por yuda nos aki na Aruba tambe. Mi ta contento di mira tambe cu na Hulanda, Arubahuis y Minister Plenipotenciario Ady Thijsen ta poneniendo Aruba riba e mapa internacional y ta cerando aliansanan cu embahadornan y paisnan”, Prome Minister a expresa.
Minister Plenipotenciario Ady Thijsen
Segun Minister Plenipotenciario Ady Thijsen, algo cu a resalta den e reunion ta cu tin hopi punto y tema den comun cu otro, entre otro historia y idioma Hulandes. Ademas, locual cu Aruba a pasa aden den temporada di Covid, nan tambe a pasa aden. “Especialmente cu awo cu Aruba mester bay diversifica su economia, mi ta kere cu lo ta hopi bon pa yega na algo cu Surinam cu ta un pais cu tambe kier crece. Pues, ta kere cu conhuntamente por haci esaki posibel.” Minister Thijsen a agrega bisando cu na varios ocasion cu papia cu sr. Khargi, ta ripara cu ta yega mas y mas na otro.
Finalmente Prome Minister Wever – Croes a expresa cu e tabata un bon reunion y a palabra cu ta bay sigui den contacto pa logra mas laso comercial y economico.
