Segun un comunicado di Aruba su Prome Minister, Evelyn Wever-Croes, no tin ningun KB, ni tampoco aanwijzing na caminda pa Aruba. Segun e premier, esaki ta confirma e compromiso di Gobierno di Aruba pa loke ta un maneho financiero saludabel. E mandatario a asisti na e Rijksministerraad (RMR) di awe diabierna, unda a trata diferente topico.

Manera ya caba ta conoci, Parlamento di Aruba a trata e ley di LAft (supervision financiero) y esaki a trece cu ne algun tension entre Aruba y Hulanda. Tabata e siman aki ainda cu e tono di e Secretario di Estado, Raymond Knops durante un debate den Tweede Kamer, tabata indica cu cosnan no ta canando na mucho agrado y cu lo por tin un posibel intervension. Sinembargo, e comunicado di Minister Evelyn Wever-Croes ta indica cu esaki no lo ta e caso.

Segun e comunicado, Hulanda tin preocupacion cu e cambionan y Premier Wever-Croes a informa nan cu e cambionan ta un coreccion di e ley cu a bay malo den pasado y Parlamento a indica cu kier coregi e aspectonan cu ta contra nos constitucion. Tambe Premier Wever-Croes a informa RMR cu pa e tema financiero mes, nada no a cambia. Gobierno ta sigui segun e plan cu a wordo stipula den e FEM y cu Hulanda a aproba y a base di esey pa otro aña lo mester tin e prome surplus despues di hopi aña.

“Nos tin hopi reto nos dilanti, y e crisis di Venezuela ta haci’e mas dificil. E desaroyo ey tin Hulanda preocupa, y combina cu e corespondencia di CAFT, ta alarma Hulanda mucho mas. P’esey Ministerraad di Aruba a evalua cu ta miho mi mes bin y aclarea e situacion. Pa loke ta supervision, mi a enfatisa cu Aruba lo keda cu supervision. Si no ta CAFT, lo ta nos propio instituto di supervision y nos ta trahando riba un alternativa pa por presenta pronto.

Pues mi a trece mi punto padilanti y mi a sigura gobierno hulandes cu nos ta trahando segun plan. Cu esaki, ta trece trankilidad den e relacion cu Hulanda pa awor, mientras nos ta traha riba nos propio instituto di supervision y contal cu nos continua cu e plannan financiero pa logra baha e deficit te na 25 miyon florin e aña aki, manera e ta den presupuesto, y un surplus di 25 miyon florin otro aña. Di e forma aki Aruba ta cuminsa porfin cana e caminda di finansas publico saludable”, Premier Wever-Croes a enfatisa den su comunicado.

Premier Wever-Croes a duna di conoce cu e reunion diabierna cu RMR a bay den un bon ambiente. Loke cu RMR a aprecia tambe di nos Prome Minister di pais Aruba, kende a subi avion bay enfrenta nan den RMR y convence nan pa duna nos tempo, y no a bay den welga di hamber.

Finalmente e comunicado ta pone enfasis riba e echo cu den e reunion di diabierna den RMR, nada di KB ni aanwijzing a wordo trata. “Aruba por ta orguyoso cu nos tin un Prome Minister cu curashi y serio y cu ta tuma maneho di pais Aruba na serio”, e comunicado ta bisa.