Un cos no por bisa y esey ta cu nos gobierno no ta percura pa espectaculo. Diabierna pasa atrobe otro sorpresa declarando guera na e proximo Gobernador y na gobierno di Reino. A pesar cu ta spera di tur gobierno cu nan ta mira nan dilanti loke ta bin y no ta keda wak atras riba loke a pasa, gobierno a opta pa crea un situacion sumamente dificil pa futuro.
Practicamente ta bisando na tanto e Gobernador como gobierno di Reino cu nan no ta bay duna e representante di Rey e trato respetuoso cu e merece. Y esey no ta loke segun nos opinion e gran mayoria di pueblo ta sinti y ta desea. E mayoria di opinion cu nos por a capta ta mustra cu talbes e forma den cual e nombramento a bay no ta esun mas elegante, pero cu e escogencia di gobierno di Reino ta uno corecto y por conta den pueblo cu e sosten grandi cu gobierno no kier duna.
Ademas mester tuma na cuenta cu den e proceso, asina leu cu nos conocemento ta yega, a consulta cu gobierno di Aruba. Si na Hulanda tabatin problema cu e nombernan cu nan a haya, esey, manera nos ta keda bisa, no por ta obheto di discusion publico. Gobierno di Hulanda, cu ta conforma e parti mas grandi y decisivo di gobierno di Reino, mester por dialoga y consulta den confiansa cu gobierno di Aruba, sin cu e proceso di ‘inspraak’ aki ta den luz publico. Pero ta parce cu nos Prome Ministro tin su mes ideanan tocante con ta hunga cu publicidad pa logra su meta politico personal pa loke ta escogencia di e proximo Gobernador.
Aparentemente e no kier comprende tampoco cu mas bo ta insisti cu ta e persona cu abo propone mester keda nombra, ta lanta e sospecho cu bo tin un meta politico di kier tin un Gobernador cu ta conoci como fiel ehecutor di bo deseonan y net esey no ta e tarea y funcion di e Gobernador.
Contrario na e disparate cu hopi hende sabi a divulga na 2014, cu Gobernador semper mester djis firma “bij het kruisje”, e Gobernador tin e opcion pa nenga di firma (articulo 21 di Reglamento di Gobernador). Pero ora e nenga, e documento aki mester bay di inmediato pa Raad van State duna su opinion riba esaki. Esey no a sucede na 2014 y e responsabilidad pa esey ta na prome luga di gobierno di Reino.
Ta parce cu cueste lo que cueste premier Eman ta desea di tin un Gobernador cu no ta ni hinca den su cabes di nenga, pasobra e ora e ta haya un Prome Ministro cu ta rabia y cu publicamente ta baha su rabia riba dje, ripitiendo e palabranan di insulto cu e tabatin pa nos Gobernador actual na 2014: “El a faya mi! Ami cu a percura pa nan nombr’e, a keda defrauda.” Ora cu bo ta haci escogencia di Gobernador publicamente obheto di debate y cuestionamento, mientras cu esaki mester ta e figura cu mester simbolisa e union di pueblo, bo ta haya straño cu Hulanda ta extra cuidadoso cu bo proposicion?
Te awe ainda parce cu nos Prome Ministro no kier comprende cu den e mundo aki bo no por haya bo gana semper y sigur no ora ta trata di e puestonan cu den cierto sentido ta representa ‘checks and balances’ den nos sistema democratico. Nunca por ta asina cu Prome Ministro di Aruba, o di Curaçao o St. Maarten, por tin e ultimo palabra den e nombramento. No ta cuestion cu gobierno Hulandes mester simplemente acepta e candidato cu gobierno di Aruba ta propone. Ademas, si bo mes tin e proceso tranca pa varios luna caba, anto awor bo ta haya straño cu nan ta actua? Ta nan tin un urgencia y responsabilidad pa nombra e representante di Rey na Aruba na tempo! Y ta nan ta nombra, no abo!
Di otro banda, ta positivo pa nota cu e partido grandi di oposicion a manda felicitacion mientras tanto pa e proximo Gobernador, dunando un señal cla unda nan ta para. Esey ta un diferencia grandi compara cu e accionnan confusivo den e casonan di e famoso amienda y e proceso bergonsoso di tratamento di e ley encuanto e refineria, unda a guli e hecho cu gobierno no tin respet ni pa Constitucion, ni pa parlamento.
Tristo ta si, cu den henter e conseho di ministro no tabatin un alma pa pone Prome Ministro bin na su tino, den su accion vengativo y irasonabel contra e proximo Gobernador. Ademas cu e guera no tin sentido, pasobra bo a perde e bataya prome cu bo a cuminsa caba. Y, mescos cu na 2014, bo no tin apoyo popular pa e protesta infantil aki. Tristo tambe ta tur e nonsense cu nos mester tende di ‘actuacion colonialista’ di Hulanda. “Grow up” nan ta bisa na Ingles: nos ta forma parti, di propio boluntad, di un entidad cu ta mas grandi cu nos! Y e entidad ey, Reino Hulandes, tin regla bon defini; cumpli!
