Ta ken e kier convence na Hulanda ainda?
Nos Prome Ministro a bolbe tene un discurso den exterior. Normalmente nos lo bisa:”OK, more of the same?”Riba invitacion di e Genootschap Nederland – Aruba el a duna un charla cu nos no a mira ainda den su totalidad, pero nos ta bay riba e contenido cu e mes a laga divulga. E tema? Su vision unico con pa desaroya Aruba, a base di un teoria dudoso den su miho forma, den esun pio devastador pa nos pais.
Durante e charla varios politico Hulandes y director general di ministerio di Interior y Asunto di Reino, van Zwol, tabata presente. Den su charla el a pidi nan mas comprension pa e caminda y strategia cu gobierno di Aruba a scoge pa resolve e problemanan economico y di otro indole cu nan a hereda na 2009 tempo cu nan a drenta como gobierno. Atrobe su audiencia a tende henter e storia di ‘e Aruba na werki na 2009 y su obligacion pa inverti en bes di economisa’. E disco rasca cu nos conoce asina bon cu nos mes por reproduci esey si nan spierta nos den marduga y puntra pa duna e discurso. Mientras e ta haya cu hende no ta comprende loke e ta propone, e problema persistente ta cu e mes no ta comprende cu otro hende no por comparti su opinion, simplemente pasobra e echonan ta mustra cu e no tin rason.
Ya cu nos a yega di amplia caba riba e tema aki, awor en corto loke no ta cuadra den su discurso economico: nos no ta un pais cu un economia diversifica, unda inversion den infrastructura por ehemplo di gobierno ta genera empleo, pero ta genera tambe produccion interno, pasobra e economia ey ta conta cu e sectornan ey. Nos cu no tin produccion ta importa tur cos, di manera cu mas di mita di e inversion original ta somenta na prome instante caba pa exterior den forma di material pa e proyecto. E trahadonan ta haya un salario, ta bay tienda y ta cumpra cos… importa pa casi 100%. Den un frega di wowo tur e ‘inversion’ a bay exterior den forma di divisa, sin cu tin un ‘multiplier effect’ significativo pa nos economia. A keda pa nos paga durante decada e placa cu a fia pa haci e ‘inversion’ aki. Kico ta asina dificil pa señor Eman comprende di e punto di bista di esunnan cu no ta di acuerdo cun’e?
Tambe Eman a bay riba e tema di ‘lamento’ cu Antias na despedida si a haya un saneamento di nan debe, y Aruba no. Pero, no ta nos ta e Rubianonan orguyoso cu no mester di niun hende? No ta nos tin un bon economia, pero mal gobierno cu ta gasta loke no tin? No ta Eman mes ta nos problema, no economia di nos isla? Si ta trato igual Eman tabata kier anto e mester a bay di acuerdo cu imposicion di CFT via un ley di Reino, anto nos tabata igual den esey tambe.
Pero pakico na e momento aki ta asina importante pa expone un punto di bista cu el a expone mil y un biaha caba? Pasobra tin problema na caminda atrobe encuanto e presupuesto 2016. Despues di un evaluacion no tanto positivo di CAFT ta vislumbra awor un conseho negativo di Raad van Advies den mas o menos mesun direccion cu esun di CAFT. Si persisti cu asina mes e presupuesto ta bay Parlamento, ya caba nos por sa cu e evaluacion di CAFT despues di aprobacion lo ta negativo tambe. Ta p’esey na e momento aki tur cos ta dal para, y e presupuesto 2016 lo ser trata otro aña, pasobra purba pasa esun aki lo hiba nos automaticamente na un intervencion Hulandes via un ‘aanwijzing’. Lo ta necesario pa sinta na mesa cu gobierno Hulandes pa crea un solucion aceptabel pa ambos banda.
Kico Eman ta haci mientras tanto? E ta buscando aliado pa por para mas fuerte posibel den e siguiente guera tocante presupuesto cu lo cuminsa proximamente cu gobierno di Hulanda (y di Reino), si no yega na e solucion ey. E lo mester di e aliadonan aki tambe pasobra e panorama cu nos tin nos dilanti ta bay mustra mas dificil ainda compara cu loke CAFT a pone riba papel pa 2016. Base pa e proyeccionnan pa 2016 mester ta e cifranan real di 2015, y no ta cuestion di compara presupuesto cu presupuesto, sino di resultado real cu resultado real. Ta p’esey e necesidad pa por conta cu un relato financiero anual elabora pa Algemene Rekenkamer na tempo tur aña, pa kibra e tradicion di compara presupuesto cu presupuesto, mientras cu hopi biaha ni esun di e aña anterior ni esun di e aña coriente tin algun relacion cu e realidad di gasta placa di mas sin tene cuenta cu presupuesto.
Y, manera nos a publica den e seccion aki recientemente, e cifranan real pa tanto gasto como entrada di gobierno na 2015 ta menos faborabel cu presupuesto 2015 tabata mustra riba papel. Pa di tantisimo biaha nos ta bay haya un presupuesto suplementario pa aproba posteriormente loke a ser gasta sin aprobacion di Parlamento.
