E plan pa reemplasa organo di supervision di Reino CAft cu Aruba su propio supervision financiero — e begrotingskamer — ainda ta den proceso. Pero ya caba ta mustra cu esaki lo ta basa riba principionan di OECD (Organisacion pa Cooperacion Economico y Desaroyo) pa supervision financiero independiente y cu e instituto aki lo mester tin ‘suficiente djente’ — segun prome minister.
Bou ‘djente’ prome minister Evelyn Wever-Croes (MEP) a splica cu mester compronde cu e camara aki lo tin poder pa establece sancion contra gobierno, ademas di modelonan di escalacion en caso cu no haci caso. Esaki ta pa e ‘no bira un organo local/nacional anto cu despues bo ta bay haya cu un gobierno no ta respeta’. E mandatario a admiti cu te ainda gobierno ‘no ta asina leu cune’, pero si ta sigur cu lo basa e instituto riba punto di bista di OECD y tambe e proyecto ‘contabel bestel’ na Hulanda den añanan 80. E proyecto Hulandes aki, segun premier, a pone tur ministerio ‘riba rails financiero’.
E idea ultimo aki a bin di parti di Algemene Rekenkamer di Hulanda, cual ultimo aña a evalua supervision financiero den islanan di Caribe Hulandes: Aruba, Corsou, Sint Maarten y e islanan BES. Pa e 3 islanan cu ta pais independiente den Reino nan a bin cu e proposicion aki, cual Wever-Croes a bisa ta un di e proposicionnan cu gobierno ta mirando. Ainda mester concretisa kico specificamente lo bay propone na Hulanda.
Fortificacion di organonan halto di estado
Desde aña pasa tin un comision pa reforsa e funcionamento democratico di Aruba, cu tin na cabes Arie Swaen, cual ta yudando tambe cu e establecimento di un organo di supervision financiero propio. Esaki ta banda di e tarea principal di e comision, cual ta pa reforsa e organonan halto di nos democracia na Aruba: Parlamento, Algemene Rekenkamer y Raad van Advies. Wever-Croes a indica cu ya a haya un conseho di e comision, unda a pidi pa gobierno amplia e cantidad di camara cu por cay bou di nan. E mandatario a expresa cu e idea ta pa pone e begrotingskamer bou esaki. Tambe e prome mandatario a aproba pa e comision bay traha riba un ley titula ‘Landsverordening Houdbare Overheidsfinanciën’.
Pa prome biaha, tambe lo bay hancra den nos constitucion cu un gobierno mester tene su mes na finanzas saludabel y duradero. “Esaki tambe lo duna parlamento e ‘grip’ pa por controla y tambe e deber pa controla gobierno.” Aunke e planificacion pa bin cu e instituto aki tabata mas cuminsando otro aña, e prome mandatario a admiti cu poco poco e ta hayando su mes ta hala esaki mas cerca na su agenda den presente. “Pero nos no kier ‘rush’ algo y asina laga e calidad sufri. Nos kier bin cu algo di bon calidad. Pues e ta tuma su tempo.”
Na fin di 2020 lo bay evalua funcionamento di CAft pa asina Aruba por bin cu su propio instituto di control financiero.
