Dialuna a tuma luga na Corsou un reunion entre e tres Prome Ministernan di Aruba, Evelyn Wever-Croes, di Corsou, Eugene Rhuggenaath y di Sint Maarten, Leona Romeo Marlin. Esaki ta di tres biaha cu e premiernan ta reuni den e cumbre di premiernan.
VENEZUELA
Varios punto a wordo trata den e dia di reunion. Venezuela tabata un punto importante riba agenda, y tambe e asistencia financiero cu Hulanda a priminti. Durante e conferencia di prensa despues di e reunion, premier Evelyn Wever-Croes a indica cu Aruba ta convivi cu Venezuela.
‘Nos tin lasonan familiar, cultural y economico cu Venezuela y nos ta convivi cu locual ta pasa eynan. Sinembargo nos no por haci mucho mas. E crisis di Venezuela no ta di Venezuela so, e no ta un crisis di e region so. E ta un crisis mundial y comunidad mundial no por bira cara mas pa e crisis aki. Nos ta un pais chikito, y nos a haci hopi caba. E impacto di e crisis riba nos pais ta grandi. Y ta un reto diario pa atende cune. Nos a, nos ta y nos lo sigui haci nos parti. Esey ta conta pa Corsou tambe. Awor demas paisnan tambe mester haci di nan parti’, premier Evelyn Wever-Croes a expresa durante e conferencia di prensa na Corsou.
E honestidad di e palabranan aki a ricibi hopi sosten na Corsou. Corsou ta pasando den circunstancianan similar cu Aruba. Pa cua motibo, premier Evelyn Wever-Croes ta bisa cu ta hopi importante pa ta para riba e mesun linea pa fortalece otro den tur e retonan cu e islanan ta enfentando. “Si nos haci cosnan hunto, nos ta mas fuerte para pa enfrenta tur e retonan.”
Reunionnan di cumbre entre e tres Premiernan a bay bon y ta e intencion pa sigui cu e reunionnan aki pa asina estrecha e lasonan mas fuerte ainda y fortalece otro den tur reto.
