(AP) – 3 biaha den e ultimo 4 luna, William Stein, un analista tecnologico na Truist securities, a acept elon Musk su invitacion pa purba e versionnan mas recien di Tesla su sistema “Full Self-Driving”.
Un tesla ekipa cu e tecnologia, segun e compania, por bay for di punto a pa punto b cu tiki intervencion humano. Sinembargo, cada biaha cu Stein tabata den un di e vehiculo, e ta conta, e vehiculo a haci maniobranan cu ta ilegal of no ta safe. Su test mas recien e luna aki, Stein a bisa, a laga su yiu homber di 16 aña cu a compañ’e “sumamente spanta.”
Stein su experiencia, conhuntamente cu un accident na Seattle cu ta involucra e sistema di Full Self-Driving cu a causa e fayecimento di un motociclista den april, a hala atencion di e reguladornan federal. Ya caba nan ta investigando Tesla su sistema automatisa pa mas di 2 aña a causa di decenas di accident cu a causa preocupacion di seguridad.
E problemanan a causa cu personanan cu ta monitor vehiculonan autonomo a bira cada biaha mas dudoso di Tesla su sistema automatisa y si esaki lo por opera di manera safe na un escala amplio. Stein ta bisa cu e ta duda cu Tesla lo por sikiera yega cerca den desaroya un cantidad di robotaxi autonomo pa proximo aña manera Musk ta anticipa.
E incidentenan ma recien a bini na un momento critico pa Tesla. Musk a bisa e inversionistanan cu ta posibel pa Full Self-Driving opera di manera mas safe cu chauffeur humano pa fin di e aña aki, si no proximo aña.
Y den menos di 2 luna, e compania tin den schedule revela un vehiculo crea solamente pa ta un robotaxi. Pa Tesla por pone robotaxi riba caya, Musk a bisa cu e compania mester demostra reguladornan cu e sistema por maneha e vehiculo di manera mas safe cu ser humano. Bao reglanan federal, e Tesla lo mester cumpli cu standard nacional pa seguridad di vehiculo.
Musk a publica data cu ta mustra mianan cu a core pa cada accident, sinembargo pa solamente Tesla su sistema menos sofistica Autopilot. Expertonan di seguridad a bisa cu e data aki no ta valido pa motibo cu e ta conta solamente accidentnan serio unda e airbag a activa no ta demostra con hopi e chauffeurnan humano mester a tuma over pa evita un accident.
Full Self-Driving ta den uso riba cayanan publico pa mas o menos 500,000 doño di Tesla, un poco mas cu 1 den cada 5 Tesla den uso dia di awe. Mayoria di nan a paga 8,000 dollar of mas pa e sistema opcional.
E compania a adverti cu e vehiculonan ekipa cu e sistema no por stuur nan mes y cu e motoristanan mester ta cla na tur momento pa interveni si esaki ta necesario. Testa tambe ta bisa cu e ta monitor tur chauffeur su comportamento y ta suspende nan habilidad di por usa Full Self-Driving si nan no monitor e sistema adecuadamente. Recientemente, e companai a cuminsa yama e sistema “Full Self-Driving” (Supervised).
Musk, ken a admiti cu su pronosticonan den pasado pa e uso di stuur di manera autonomo tabata demasiado optimista, den 2019 a priminti un gran cantidad di vehiculo autonomo pa fin di aña 2020. 5 aña despues, varios di esnan cu ta sigui e tecnologia ta bisa cu nan tin duda cu esaki lo por funciona na Merca manera a priminti.
“E no ta ni cerca, y e no lo ta cerca proximo aña tampoco,” Michael Brooks, director ehecutivo di Center for Auto Safety a declara.
