Parlamentario Robert Candelaria (AVP) a manda preguntanan na escrito pa prome minister Evelyn Wever Croes (MEP) riba su relacion cu Toro Rodriguez.
E parlamentario a tuma nota di indicacion cu posiblemente lo a detene Juan Carlos Toro Rodriguez, cu segun medionan di comunicacion, tin lasonan masha estrecho cu e lider di MEP y actual minister presidente di nos pais. Specialmente den campaña a nota hopi potretnan hunto, dunando indicacion cu Toro Rodriguez tabata bodyguard di e lider politico. Y awor sr. Rodriquez ta supuestamente deteni.
El a manda 14 preguntanan. Entro otro si e mandatario ta na haltura cu e persona (sr. Rodriguez, red.) ta deteni y si e por splica su relacion cu e sospechoso. Tambe un di su pregunta ta, si e minister presidente sa cu e mesun persona aki tin un compania di transporta productonan di balor anto cu tin su oficina na Arulex Building. Y cu ta e mesun adres cu e bufete di abogadonan Croes-Wever-Tchong? (e compania di e tata di prome minister).
E parlamentario no por kere cu tanto problema cu Aruba a haya cu Venezuela pa e asunto aki di transporte ilegal di oro, cu gobierno di Aruba a nenga di sa algo y awor ta resulta cu un di e posibel sospechosonan principal ta masha yega na e mesun minister presidente di nos pais. P’esey e kier sa kico e mandatario tin pensa di haci awor cu e realidad aki a presenta.
E miembro di parlamento ta spera di por haya contestanan pronto di minister presidente Wever-Croes.
