Parlamentario di fraccion di AVP, Robert Candelaria a mustra cu ya pa algun tempo tin rumornan insistente ta dunando indicacion cu tin contrabanda di oro di Venezuela cu ta pasa via Aruba. El a sigui mustra cu manera tur hende sa, Venezuela a cera frontera cu Aruba unilateralmente desde 5 di januari di e aña aki caminda prome minister a culpa gobierno anterior pa e ceramento di frontera aki cu nos pais bisiña. Na mes momento segun sr Candelaria, premier a bisa cu gobierno anterior tabata na haltura di contrabanda di koper tambe via Aruba y cu gobierno no a haci algo na esaki, cu a resulta cu Venezuela a cera frontera.
“Esaki prome minister a bin parlamento tambe y a splica esaki y despues nos ta compronde cu tin mas informacion tras di esaki cu no a wordo atendi durante di e reunion. E informacion ta cu oro di Venezuela ta wordo saca di e pais y exporta via Aruba caminda e contrabanda aki ta wordo relaciona cu un persona cu tabata hopi yega cu e team di campaña di prome minister, lider di MEP. Su empresa, Paoro transport ta estableci den Arulex Building cu ta e mesun oficina di bufete di abogado Croes Wever Tchong y asina tin mas indicacion cu aki ta trata di un caso cu merece mas investigacion.
Mi ta sali di e punto di bista cu tin un investigacion andando den e caso aki y cu nunca ta prudente pa mishi of interveni cu esaki. Loke si mi a haci ta manda un serie di pregunta inicial na prome ministro pa haya splicacion di kico tin di berdad den e caso aki. Saliendo di e punto di bista cu gobierno a bisa cu e ta basa su acuerdo di gobernacion riba transparencia y respet pa institucionnan democratico, mi ta spera di haya contesta pronto pa aclaria un ke otro den e caso delicado pero importante aki”, parlamentario Robert Candeleria a mustra
