Despues cu Promer Ministro Evelyn Wever-Croes a informa Parlamento den un reunion dia 7 di december ultimo, encuanto e situacion di e peticionnan pa interes pa inversion den e refineria y/o otro iniciativa riba teritorio di Refineria di Aruba NV, parlamentario Daphne Lejuez a manda un serie di pregunta adicional pa e mandatario.

E proceso di busqueda di inversionista ta contempla dos proceso simultaneo, conoci como REOI 1 y REOI 2 (Request for Expression of Interest) di cual e promer ta referi na intento pa reinicia operacion di e refineria, mientras e segundo ta pa iniciativa di uso alternativo di e instalacionnan y e tereno di su alrededor.

Relaciona cu esaki e parlamentario ta inicia su preguntanan cu informa si e ministro presidente ta na altura cu mundialmente tin mas refineria ta cera cu tin bao construccion y cu produccion di combustible fosil a keda reduci considerablemente. Tambe ta puntra si e mandatario ta conoci cu expresionnan haci pa presidente electo di Merca, Joe Biden, cu tin intencion di limita produccion di combustible fosil rapidamente y cu kier inverti den fuentenan di energia alternativo y cu su gobierno practicamente inmediatamente despues di su inauguracion lo firma e acuerdonan di Paris. (Esakinan ta compromete e paisnan firmante na cumpli cu e acuerdonan pa reduci emision di gasnan cu ta ocasiona e efecto invernadero, cu ta causa di aumento di temperatura di lama y di clima general; red.).

Seguidamente ta puntra si promer ministro ta na altura cu e prijs promedio di petroleo pa basta tempo caba ta hopi abao y cu e ganashi riba explotacion y refinacion di petroleo a keda bastante reduci y cu no ta anticipa tanto aumento di prijs mas tampoco.

E parlamentario ta puntra tambe cu si promer ministro ta comparti e opinion cu inversion den un refineria bieu no tin credibilidad y cu e no lo trece un perspectiva pa futuro di Aruba. Tambe si e mandatario ta na altura di e hecho cu un inversion di 3,5 biyon dollar ta supone un periodo di tempo pa recupera e inversion di mas di 20 aña, mientras cu henter e sector (di petroleo; red.) na e momento aki ta preparando pa un reduccion gradual di produccion di petroleo den direccion di 2050. Si ta posible lo aprecia di ricibi un splicacion di e modelo di beneficio economico di e empresanan selecta pa e procesonan REOI 1 y 2.

Tambe si ministro presidente ta consciente di e hecho cu tur otro refineria orienta riba exportacion den e region aki no ta den operacion, mientras nan tur ta den hopi mihor estado tecnico cu esun di Aruba. Ta trata aki di Curacao, St Croix y Trinidad & Tobago .

E parlamentario ta puntra tambe riba ki producto specifico e refineria ta bay enfoca y di ki parti e petroleo cu ta bay usa ta bin. Por fabor un splicacion por escrito di esaki. Ta haci e pregunta tambe si e mandatario no ta mira mas perspectiva pa futuro den un economia duradero pa Aruba, cu aplicacion di tecnologia nobo y limpi, cu a corto plazo por haci un contribucion considerable na GDP y por yuda haci Aruba su economia uno sostenible den futuro. Tambe si e mandatario por duna un splicacion por escrito di e criterionan cu cual e comision di RdA a haci e evaluacion y cu a conduci na e conclusion pa scoge pa e dos comanianan Mericano Eagle LNG y Quanten LLC. Y si e mandatario por pone e reportahe final di RdA y e documentonan di tender di e companianan selecta na disposicion di Staten. Si esey no ta e caso, anto ta spera un splicacion por escrito.

E di diez pregunta ta si e ministro presidente ta comparti e opinion cu Aruba, poblacion di Aruba y economia di Aruba lo ta beneficia cu un posicionamento internacional duradero unda no tin lugar mas pa industria contaminante, loke principalmente lo ta na beneficio di medio ambiente (flora y fauna (submarino), salubridad publico y e atraccion di Aruba como destino turistico. Si esey ta e caso, ta con e mandatario tin pensa pa realisa esey, y si no, por fabor un splicacion por escrito.

Finalmente e parlamentario ta puntra si ministro presidente ta di opinion cu e comision apunta pa RdA ta capaz di independientemente tuma decisionnan asina importante pa futuro di Aruba. Y si no tabata mihor pa acerca expertonan internacional pa esaki. Den ambos caso, si of no, por fabor un splicacion por escrito.