Temporada di campamento pa Semana Santa a cuminsa, y manera custumber tin un cantidad grandi di hende cu ta disfruta di e temporada aki. Hunto cu e tempo agradabel cu ta wordo comparti entre sernan keri, ta bin e parti cu mester paga bon tino cu ne, esta higiena. Particularmente ora ta trata di cuminda. Relaciona cu esaki, a ricibi e siguiente relato di Departamento di Salud Publico.

Campamento durante di Semana Santa ta masha gusta. En conexion cu e temporada aki, Departamento di Salud Publico ta pidi pa pone hopi atencion y no neglisha importancia di “food safety” durante campamento. ‘Dienst Warenkeuring en Hygiene’ di Departamento di Salud Publico tin algun recomendacion con pa trata cu cuminda di un forma cuidadoso y corecto, pa evita cu un hende por bira malo door di cuminda.

Mescos cu na cas, ta hopi importante pa mantene cuminda cayente na e temperatura cayente 65ºC of mas halto. Cuminda friu na un temperatura di 5ºC of mas abou. Ta recomendabel pa mantene tur cuminda friu den un jug cu hopi ijs of cu ‘frozen gel packs’. Planifica bon ki tipo y con ta lo bay trata cu cuminda durante e temporada aki. Cuminda di bleki ta hopi sigur pa e temporada pafo di cas. Tipo di cuminda cu por hiba ora di campamento ta Peanut butter den plastic; Paki di juice; Cuminda di bleki, manera tuna, carni di bleki etc.; Sopi paki of di bleki; Fruta seco, noot y lechi polvo.

Si ta hiba carni, galiña pa cushina, ta importante pa hiba stoof, material y aparato di cushina y un thermometer; Corda hiba jug cu frozen gel packs of hopi ijs pa warda carni, galiña y pisca cu ta curu; No pone jug unda solo por cay riba dje, pone den sombra; Evita pa habri jug constantemente, pa asina e carninan ta keda bon friu; Ideal ta pa pre-cushina e cuminda y pone den jug.

Ora di grill cuminda, corda separa tabla di corta, material y aparato di cushina cu ta ser uza pa carni curu for di cuminda cushina, berdura of pan. Esaki pa evita contaminacion. Mantene cuminda friu na temperatura friu te na momento cu ta cla pa cushina. Cushina tur carni, galiña, cuminda di lama suficiente pa nan no keda curu y na e temperatura minimo cu mester yega; Carni mula 72ºC, Carni, carni porco, steak 72ºC, Galiña 74ºC y Hamburger 74ºC.

Mantene tur cos limpi, semper uza tayo limpi (desechabel) pa sirbi cuminda. Nunca re uza un material cu a bin den contacto cu carni of galiña curu pa sirbi e cuminda cushina. Ora di sirbi cuminda no laga un cuminda para afo pa mas cu 2 ora; Cuminda ta bira peligroso ora e ta den e zona peligroso di temperatura cual ta entre 5ºC – 65ºC pa mas cu 2 ora; Mantene tur e carninan cushina ariba grill te prome cu nan mester wordo sirbi.

Sigui e 5 stapnan pa cuminda saludabel: Limpiesa, laba man prome cu preparacion di cuminda y despues di uza baño (wc); Laba y desinfecta tur material; Separa alimento curu for di alimento cushina; Separa cuminda curu for di cuminda cushina; Uza diferente ekipo y material pa cada tipo di alimento; Cushina tur alimento, Cushina tur cuminda bon, Temperatura mester yega 65ºC of mas.

Mantene cuminda na un temperatura adecuado, cuminda friu bou 5ºC y cuminda cayente riba 65ºC. Uza awa y alimento limpi y liber di peliger; Laba fruta y berdura bon y nos uza producto cu su fecha a vence. Conocemento ta prevencion y nos ta desea tur esunnan cu ta campa dianan placentero. Pa mas informacion por tuma contacto cu Departamento di Salud Publico na telefon 5224200.