Despues cu a ser conoci e cantidad di caso di Covid positivo cu nos pais ta bin registrando ultimo dianan, aeropuerto a dicidi di kita tur garashi paden y pafo di nan instalacion.
E decision aki a trece algun disgusto cune, ya cu tanto e biaheronan cu ta bin como esunnan cu ta bay, tin mester di nan pa alivia nan peso, ora cu nan ta biaha cu tanto ekipahe.
Consecuencia di esaki ta cu tur hende mester lastra tur nan ekipahe. Pero di otro banda e garoshi ta bira un instrumento esencial hasta recomenda den su protocol dor di DVG, pa yuda mantene distanciamento social den sitionan publico.
Bon Dia Aruba a tuma contacto cu PR di Aruba Airport Authority (AAA), Hendrik Croes kende inicialmente a laga sa cu aeropuerto a dicidi di kita e garoshinan temporalmente pa evita puntonan di contacto (touch points).
Sinembargo e matutino aki a insisti cu precisamente tin protocol cu ta pidi e uzo di e garoshi den sitio publico, por ehempel den supermercadonan. Tin linea y flecha poni den tur establecimento cu DVG ta pidi pa respeta nan, esaki precisamente pa evita e puntonan di contacto.
Es mas ora cu e hendenan ta para den rij e uzo di e garoshi ta bira un instrumento importante ta mantene distaciamento social un for di otro. Sinembargo e uzo di garoshi ta demanda logicamente cu mester tin personal pa desinfecta nan.
Riba e punto aki, PR di AAA a laga sa cu actualmente aeropuerto mes ta bezig cu un protocol pa pone e garoshinan bek den servicio e siman aki mes, durante e oranan peak.
Hendrik Croes a agrega cu diasabra awor e garoshinan lo ta bek den servicio, solamente pa esunnan cu ta yega (arrivals) Aruba. A pesar cu esunnan cu ta bay di biahe tambe ta carga tanto maleta, pero nan no por haci uzo di e garoshinan. Croes a splica cu e motibo tin di haci cu e personal ta limita, y esnan di yegada tin cu pasa dor di procesonan mas largo cu nan maletanan.
