E caso di e hoben cu a fayece diaranson marduga na Paradijswijk y cu a test positivo pa Covid-19, a bolbe lanta un preocupacion cerca comunidad relaciona cu casonan di pashent asintomatico cu no a mustra e sintomanan of cu nan sintomanan ta masha leve pa Covid-19.
DVG a yega di informa cu -segun nan protocol- a instrui su personal pa bay haci e investigacion necesario y nan a dicidi pa test e fayecido pa COVID-19. “E resultado di e test haci riba e fayecido a indica positivo pa COVID-19. Segun e mama di e fayecido dia 14 di april ainda su yiu tabata move den e bario cu e posibilidad di por a contagia otro persona cu esaki.
Ta trata di un persona special cu ta move hopi den e bario y ta cuminda tur hende cu e topa. Pa e motibo aki a pidi aprobacion di e mama pa por divulga e informacion aki pa asina por yuda para e contagio di COVID-19. E famia ta dunando tur cooperacion necesario pa cu esaki,” asina e comunicado di DVG a bisa.
For di dia 25 di maart, Bon Dia Aruba a yega di expresa su preocupacion riba pashent cu por ta asintomatico y cu den cuarentena tin contact cu otro hende, ya cu e no ta presenta e sintomanan. Te ainda no ta conoci -segun data di DVG- cuanto caso di contagio por a tuma luga for di pashent asintomatico.
Diahuebs PR di DVG, Jurette Croes a contesta na Bon Dia Aruba cu e pashentnan asintomatico no ta wordo getest na e momento aki. “Te na e momento aki nos no a encontra ningun caso, unda un persona of famia di uno asintomatico a test positivo,” el a bisa.
