Dialuna awor dia 12 di augustus ta wordo conmemora Dia Internacional di Hubentud. Un fecha cu Nacionnan Uni a bin cune pa e paisnan rond mundo pone extra atencion riba nos futuro generacion.
Actualmente ta existi 1.800 miyon hoben entre 10 y 24 aña di edad den henter mundo. E ta e poblacion hubenil mas grandi den historia di humanidad. Sin embargo, mas cu mita di e muchanan y adolescente entre 6 y 14 aña, no sa lesa of nan no tin un conocemento basico di matematica; a pesar cu mayoria di nan ta bay scol. E crisis global den e proceso aki di siñamento ta menasa cu forsa e progreso pa logra e Metanan di Desaroyo Sostenibel (SDG).
Communicatie Adviseur y PR di Departamento di Salubridad Publico (DVG), Jurette Croes a bisa cu e topico dedica na nos hobennan ta ‘Transformando Educacion,’ y pa duna contenido na e tema aki lo pone atencion na inicio di aña escolar nobo. Pero tambe na nan salud y Aruba no ta un excepcion. Den e caso aki, DVG ta considera cu salud mental di e hobennan ta hopi importante y denter di poco lo conoce un expansion di nan servicio di SPD (Sociaal Psychiatrische Dienst), caminda nan lo enfoca riba e salud di muchanan y hobennan.
Croes a bisa cu no solamente nos mester transforma nos educacion den scol, pero ta hopi importante cu nos por transforma nos educacion na cas. “Nos no por educa nos yiunan awe den e mesun sistema cu nos a wordo educa antes. Ya cu nos ta den temporada diferente,” el a bisa.
Tempo di antes no tabatin Internet y menos social media manera awe cu ta haci cu influencianan di factor externo ta mas grandi riba e hobennan. Y e educacion na cas ta keda semper esun mas importante y nos hobennan mester di esaki. “Nos conseho pa e mayor ta pa conecta cu nos hobennan.” Hopi hoben ta sinti cu nan no ta conecta cu nan mayornan debi cu nan no tin tempo y nan no ta papia cu nan.
Dia 17 di december 1999, Asamblea General di Nacionnan Uni a declara 12 di augustus como Dia Internacional di Hubentud, como un recomendacion cu a bini for di Conferencia Mundial di Ministronan di Hubentud. E celebracion anual aki ta busca promove e rol di e hobennan como partner esencial den e proceso di cambio.
