PPA – Un partido social democrata

Nos a drenta aña electoral 2017 y ya caba por mira algun partido preparando pa subi caya y campaña. Varios partido ta cla y a cuminsa caba mientras cu otronan ta den nan ultimo fase di preparacion. Nos a acerca e diferente partidonan cu ta bayendo eleccion y lo ta siguiendo nan pasonan durante e proceso electoral compartiendo cada desaroyo cu presenta.  Segun e desaroyo di eleccion, nos lo bini cu entrevistanan bayendo mas profundo den e vision di cada partido. Den e manera aki abo como votado por keda informa y tin un bista mas amplio pa yuda bo cu bo decision di voto.  Awe nos ta continua cu Partido Patriotico di Aruba (PPA)

PPA – Un partido social democrata
Benny Nisbet, lider di partido, ta conta nos cu PPA a wordo funda na 1949 door di Juan Enrique Yrausquin hunto cu Porfirio ‘Fichi’ Croes. Nan a bandona partido AVP e tempo ey segun sr. Nisbet, pa motibo di diferencianan di opinion riba tereno estatal.  “Tabata trata e periodo cu mester a evalua si ta acepta un proposicion di Hulanda cu tabata consecuencia di e asina yama Plan van Poelie di e tempo ey.”

E diferencia a concentra su mes riba e poder di Aruba den un posibel Antias, na unda cu Aruba na e momentonan ey tabata tin 8-8, lo a perde su representacion y Corsou lo a haya 4 acerca cual a duna nan e mayoria den e constelacion Antiano. Juancho Yrausquin y Fichi Croes tabata contra y Henny Eman a dicidi di acepta e proposicion aki pa motibo cu su yiu homber tabata minister sin cartera na e momento ey. Pa no perde esey, den su concepto, segun sr. Nisbet: “El a acepta esaki y Juancho a bisa si bo acepta esaki awo, e Hulandesnan no ta bay permiti cambio bin asina facil. Consecuencia di esey tabata ta cu Aruba a forma parti di Antias Hulandes pa 32 aña, den cual e posicion di Aruba semper a wordo cuestiona pa nos pueblo.”

E meta cu Juancho Yrausquin tabata tin pa lanta partido PPA, tabata pa pone accento riba desaroyo social. El a percura segun sr. Nisbet pa cambio riba tereno di enseñansa na unda tur mucha cu no por a bay scol pa motibo di famia grandi, a logra haya un educacion pa studia den exterior. Bao di Juancho y PPA a bin tambe e prome onderstand cu pais Aruba a conoce, pero tambe e prome ley di pensioen pa nos grandinan. “Bao di PPA a wordo construi mas cu 30 scol rond Aruba creando posibilidadnan moderno pa e tempo ey den enseñansa Arubano.”

Renobacion di organisacion politico
E partido tin 67 aña den existencia anto a pasa den un epoca di ta e partido di mas grandi di Aruba. Despues a bin un epoca den oposicion cu shete asiento anto tempo cu sr. Nisbet a tuma over liderato di partido nan tabata tin tres asiento. Di tres asiento esaki a baha pa cero asiento y dos di nan principalmente pa motibo di diferencia di opinion grandi den e tempo ey y awe nan ta pafo di parlamento.  Sr. Nisbet: “Nos a keda hiba un oposicion pafo di parlamento  na unda cu anualmente nos a entrega na prensa un 120/130 declaracion di opinion di PPA riba topiconan diversifica. Hopi partido cu tin hasta representacion den Staten kisas no tin e cantidad di articulo cu nos ta manda. Nos ta reuni como partido tur diaranson y diasabra den loke nos ta yama un think tank. Akinan nos ta papia riba plannan nobo y prepara e documentonan cu nos ta bay comparti cu pueblo pa nan por husga e vision di PPA riba varios tereno.”

Na mesun momento nan ta combersando cu varios cara nobo pa haci un intento riba renobacion di e organisacion riba tur nivel cu esey ta posibel. Nan a haya algun hende y segun sr. Nisbet e proceso no a termina. “Esey ta termina ora bo entrega bo lista na oficina pa asina participa den e proceso  di eleccion.”

Campaña
Tur organisacion politico tin su campaña y ta scoge su momento pa subi caya. Segun sr. Nisbet, oficialmente, campaña ta entre 4 di augustus pa 22 di september cual ta 48 dia stipula den ley.  “Den transcurso di tempo, cierto momento bo por a mira cu partidonan politico a cuminsa bira un luna of algun siman prome cu esey. E ultimo añanan esaki a bira te 6 luna delanta cu mas tanto e partidonan grandi cu hopi placa ta inicia. Nos no ta sigui nan. Nos tin nos propio strategia y ta scoge e momento cu nos ta subi caya cual ta mayoria di biaha entre seis pa ocho siman prome cu e fecha di entrega lista.”

Ora cu bo subi caya, bo mester tene cuenta cu bo tin cu keda activo tur e tempo aki te 22 di september. Cual no ta facil segun sr. Nisbet, den un sociedad cu 8 pa 10 partido politico y varios partido nobo. Pa motibo cu semper e reparticion di comercio pa cu e organisacionnan politico no ta obhetivo. “Un nan ta duna trankil miles di florin, otro ta haya un paar di cien florin y bo mester purba biba y funciona cu esey.”

Aruba pa e proximo nivel
Aworaki PPA ta den preparacion di cinco documento. Un lo trata desaroyo di Oranjestad como nos capital. Tin un otro cu nan ta traha tur aña cual ta e agenda pa San Nicolas y con nan ta mira e desaroyo di esaki. “Nos tin un documento cu ta encera e lucha di nos pueblo y autoridadnan pa frena criminalidad, con PPA ta mira esaki y kico ta nos maneho den futuro. Anto nos ta mantene nos masterplan economico y general cual ta wordo traha riba dje y algun ta hopi cerca di ta cla caba. E titulo di nos programa ta Aruba pa e proximo nivel.  E nificacion di nos lema Level Up y vota PPA ta pa cada ciudadano mehora su status dentro di e maneho di nos partido. Kiermen e resultado di un maneho di PPA lo nifica cu henter e sociedad ta bay pa un nivel mas halto y cada ciudadano lo mehora su status den nos sociedad. Esey ta nos meta.”

Video entrevista cu PPA