Durante e ultimo fin di siman na e conferencia di tecnologia Atech un di e oradonan, Adam Smiley Powolsky a hiba un discurso dilanti enfocando riba e generacion di hobennan conoci como millennials. El a splica cu aunke e generacion aki tin mala fama rond mundo, e por mira cu ta e generacion aki tin mas interes den bira entrepeneurnan social.

E mes como un millennial a conta su experiencia como un trahado y su frustracionnan cu structuranan di organisacion unda no tin suficiente espacio pa hende jong cu ideanan nobo yuda trece cambio den nan mes organisacion.

Sr. Powolsky a splica na e matutino aki cu e rason dicon el a dicidi di bin Atech pa prome biaha ta pasobra: ‘mi ta kere cu innovacion ta tuma luga den luganan manera Aruba y den Caribe en general unda tin ecosistemanan chikito den cual personanan ta purba duna forma na nan soñonan’.

E generacion di millennials segun sr. Powolsky no tin e pensamento cu bo mester haci un trabou cu bo no gusta djis pasobra esaki ta duna bo un facilidad economico. “Hopi biaha mi a yega di wak mi amigonan laga un trabou bay cu ta paga miles mas cu un trabou cu nan tin pasion pe”.

Esaki segun sr. Powolsky tambe ta notabel den e manera con e generacion ta mas dispuesto pa tuma riesgo den nan bida. “Antes e pensamento ta cu si bo no ta contento cu bo trabou bo tin cu busca cambio pasobra asina e realidad ta. Pues e generacion aki ta cambiando e realidad”.

Loke sr. Powolsky a uza como ehempel ta e echo cu na Merca hopi hende tin un bista negativo riba e generacion aki. Te hasta a bin un nomber nobo pa nan: The me me me generation.

Pero pe ta mas evidente cu e opuesto ta berdad: cu millennials ta enfoca mas riba e medio ambiente, ta purba comprende problemanan social y cu nan ta menos enfoca riba nan mesun rikesa.

Entrepeneur social

E orado ta conta cu e ta biba na Silicon Valley na San Francisco unda tin hopi entrepeneurship y hopi placa ta circula, pero e ta haya cu e innovacion berdadero, ideanan fresco y e personanan cu di berdad ta kibrando barera ta bin di luganan manera Aruba. “Mi a realisa esaki despues cu cada biaha mi a bay paisnan den exterior pa papia na eventonan y skirbi, mi a nota cu na luganan unda tin menos atencion e miho trabounan ta wordo haci”.

Sr. Powolsky tambe lo kier tambe yuda pa crea un ecosistema nobo di innovacion riba e isla y duna su perspectiva riba kico e generacion nobo millennials kier y con nan por wordo yuda pa trece e cambionan cu nan kier dilanti.

E tipo di innovacion cu sr. Powolsky ta haya mas interesante ta entrepeneurs cu ta enfoca riba resolve problemanan social. “Mi no ta kere nos mester un app mas cu ta yuda nos yega na luganan mas lihe of cu ta yuda nos haya un restaurant a come. Mi ta kere tin suficiente di esaki”.

Cu esaki sr. Powolsky kiermen companianan cu berdaderamente ta purbando pa podera e comunidadnan cu no tin bos of cu tin falta di poder pa haci un diferencia pa nan mes.

“P’ami un entrepeneur social ta un persona cu ta uza modelonan di negoshi pa haci ganashi enfocando riba maneranan con pa trata problemanan social. Un persona cu mi por menciona ta Debbie Sterling, kende mi conoce hopi bon y a cuminsa e compania conoci como GoldieBlox”.

GoldieBlox ta un compania cu ta enfoca riba crea coy hunga pa mucha muhenan. Pero no ta trata aki di un compania tradicional cu ta djis traha coy hunga. E coy hunganan cu GoldieBlox ta diseña ta purba siña mucha muhenan con pa bira ingeniero den futuro. Esaki nan ta haci pa medio di desaroya e habilidadnan necesario pa ingenieronan.

“E idea pa GoldieBlox Debbie a bin cu ne despues di a experiencia cu na Stanford y tambe den trabounan cu e lo tuma no tabatin casi hende muhe cu tabata traha hunto cu ne como ingeniero. E kier purba cambia esaki na un edad jong. Esey mi ta haya interesante di entrepeneurnan social, nan ta purba mehora mundo pa medio di trece mas compasion y mas sostenibel”.