Postkantoor ta premira cu nan servicio di E-post lo bira e futuro di nan existencia. Cantidad di mercancia for di TV, tire auto, etc. ta wordo cumpra pa nan cliente via online haciendo uzo di Postkantoor.
Pero considerando cu den pasado kehonan a keda publica di clientenan cu nan pakete a somenta of horta for di Postkantoor sin cu nunca a yega na nan man; a bin cu algun medida interno. Entre otro a keda introduci un persona encarga cu siguridad y procedura postal
Director di Postkantoor, Guillermo Raymond a laga sa cu hopi di nan sistema di pasado a cambia, treciendo mas siguridad. “Nos sa cu nos producto a cambia y nos tambe mester bin cu cambionan pa siguridad di nos producto y tambe di nos personal”, el a bisa.
Nan a pone un persona encarga cu siguridad of procedura postal. E persona aki a wordo prepara door di Universal Post Union. Tambe sr. Raymond ta miembro di e board di Caribbean Postal Union unda hopi di e cambionan ta wordo haci pa mehora e servicio postal den nos region. “Cu mi experiencia mi ta yudando den Caribe, y tambe pa trece e cambionan na Post Aruba pa e futuro”, el a bisa.
Tambe internamente a introduci camaranan den sitio strategico den Postkantoor. E meta di e tipo di camara aki ta pa brinda proteccion na e personal di servicio postal; pero tambe na e productonan y postnan cu ta yega Aruba via di nan.
Sr. Raymond a laga sa cu e balor di nan producto a cambia; y esey ta demanda cu nan mester a bin cu mas siguridad. E ta corda cu mas cu un aña pasa antisocial a drenta na Postkantoor, mirando e tipo di mercancia y productonan cu nan ta biniendo cu nan na Aruba. “E productonan y mercancianan cu nos ta biniendo cu nan na Aruba ta haya un balor mas pisa, contrario na e tempo aya cu bo ta haya cartanan den Postkantoor of pakinan cu pañanan uza”, el a bisa.
