ORANJESTAD – Un potret cu a causa hopi reaccion na Aruba tin di haber cu un poster di presidente di Asamblea Nacional, Juan Guaidó, poni riba muraya di Consulado di Venezuela na Aruba.
E hecho aki, cu consulado di Venezuela na Aruba a considera un acto di ‘vandalismo’, a crea e impresion cu nan a bay den e mesun direccion cu e consul di primera di Venezuela na Miami, Carla Angola Rodriguez, kende a declara cu e ta reconoce como presidente encarga e ciudadano diputado Juan Guaidó.
E potret aki a wordo divulga via rednan social, caminda riba un leyenda ta wordo bisa entre otro cu ora a yega pa tur representacion of mision diplomatico di Venezuela y delegado militar por asumi e lucha pa e libertad.
Ayera, Bon Dia Aruba a tuma contacto cu consulado di Venezuela na Aruba, kende a desmenti e tweet cu Falconoticias a divulga tocante e potret poni riba muraya di e fachada di nan sede diplomatico. Consul di primera, Amabel Lugo, a declara na e matutino aki cu e potret en cuestion tabata un acto di vandalismo.
Ademas, cu e mision diplomatico di Venezuela na Aruba ta reconoce e ciudadano Nicolas Maduro como nan presidente. Tambe, nan ta informa na e comunidad Venezolano na Aruba cu nan oficina ta habri, y nan ta sigui funciona den nan orario normal di 9or di mainta pa 2or atardi, for di dialuna pa diabierna.
