Post Aruba ta emiti un serie nobo di stampia “Arte Marcial 2020”

Dia 30 di october 2020, Post Aruba N.V. ta emiti un serie nobo di “ARTE MARCIAL 2020”.

E serie ta consisti di cuatro (4) stampia balora na 100 cen, 130 cen, 220 cen y 320 cen, cu ta yega na un prijs total di Afl. 7,70 y e ta acompaña pa su ‘envelop di prome dia di emision’ cu ta costa Afl. 9,45.  E diseñonan pa e stampia aki ta un creacion di Rudberth Wolff y e stampianan ta imprimi na Johan Enschedé Security Print.

E cuatro stampianan ta ilustra 4 diferente estilo di Arte Marcial di 4 diferente region rond mundo.

100 cen: Capoeira ta un arte marcial Afro-Brasileño cu ta combina elementonan di baile, acrobacia y musica. El a keda desaroya door di esclavonan Africano na Brazil na principio di siglo XVI. E ta conoci pa su maniobranan acrobatico y compleho, hopi biaha cu e mannan na suelo y scopmento den direccion contrario.

Capoeira tabata prohibi, pero esaki no a stop e capoeristanan di practica e arte marcial aki.

Nan a camufla e arte marcial den forma di baile. Na mita di siglo XX, e capoeristanan a cuminsa biaha pafo di Brasil y nan a introduci Capoeira na e resto di mundo.

Dia 26 di november 2014, UNESCO a concedi Capoeira un statuto special proteha como patrimonio cultural inmaterial. A keda reconoci cu e “Circulo di Capoeira ta un luga na unda bo ta haya conocemento y habilidadnan door di observacion y tambe imitacion” y cu ta “promove integracion social pa asina recorda e resistencia na e opresion historico”.

E roda ta un circulo forma pa e capoeiristanan y ta rondona cu instrumentonan musical di capoeira. Dos capoeirista ta drenta den e roda y ta hunga e wega manera e ritmo musical ta indica. Musica ta importante den e capoeira. E ta determina tempo y estilo di e wega cu ta bay tuma luga den e roda.

Instrumentonan y canto ta forma e musica y ritmicamente e ta keda dirigi door di un instrumento tipico cu nan ta yama berimbau, di lento pa rapido, dependiendo di estilo di e roda.

Awendia nan ta practica esaki den henter mundo, tradicionalmente y competitivamente den grupo, durante eventonan, na diferente institucion y competencia. Na Aruba tin varios club di arte marcial Capoeira.

130 cen: Karate, un arte marcial originalmente di e isla Okinawa na Hapon, ta un estilo di arte marcial predominantemente sorprendente. Karate a keda influencia pa un estilo Chino di Kung Fu, cu a desaroya su mes durante siglonan y a bira popular na principio di siglo XX ora e migracion pa Tokyo a tuma luga.

Despues di Segunda Guera Mundial, Okinawa tabata un base militar pa Estados Unidos y karate a bira popular bou di e militarnan.

E influencia di e peliculanan di añanan 60 y 70 di siglo pasa, a yuda popularisa arte marcial grandemente y ta asina karate a keda hancra den e cultura pop moderno den programanan di television, pelicula, etc.

E popularidad di karate ta na tur parti di mundo. Bo por topa un dojo na casi tur pais di mundo.

Bo por practica karate como un arte (buda), defensa propio of como un deporte di combate.

Por parti entrenamento di karate generalmente den kihon (basico of fundamental), kata (forma) y kumite (bringamento sin reglanan definitivo ken lo ta e ganado).

E Federacion Mundial di Karate ta afirma cu tin 100 miyon practicante den mundo, loke a hacie un arte marcial masha popular.

Aruba tin hopi Karate Dojo’s of club cu ta practica y participa na competencianan local y tambe internacional.

220 cen: Lucha Libre Griego, tambe conoci como lucha antiguo Griego y Palé, tabata un deporte mas popular organisa na Antiguo Grecia. Nan ta anota un punto ora un hungado mishi e vloer cu su lomba, heup of schouder of ta admiti e derota ora e capitula of ora el a keda forsa pa sali di e zona di lucha libre.

E competencia antiguo aki di lucha Griego tambe a keda añadi na e Weganan Olimpico na 708 a. C. (Prome cu Era Comun).

Nan tabata siña y practica lucha libre den un edificio cu nan ta yama palaestra.

Ta den salanan di gymnasio nan tabata siña y practica e otro deportenan.

E atletanan Griego tabata e poconan den mundo antiguo cu tabata practica y competi sunu. Ningun hende sa exactamente ta kico ta e motibo.

Den e tempo moderno aki ainda nan ta practica lucha libre y el a crece den diferente estilo. El a influencia hopi otro artenan marcial y ta parti di entrenamento di combate.

El a crece for di un deporte olimpico te na lucha libre profesional den entretenimento, como un programa di lucha libre den estilo estadounidense na television of lucha libre den estilo di Mexico. Cu e popularidad di MMA (artenan marcial mixto), ta lucha libre ta ser considera como un di e disciplinanan clave pa MMA hunto cu e otro artenan marcial.

320 cen: Arte Marcial Chines cu hopi biaha ta ser nombra bou di e terminonan manera kung fu, kuoshu of wushu, ta varios shen di estilonan di lucha cu a keda desaroya den curso di siglonan na China. Hopi biaha nan ta keda clasifica di acuerdo cu caracteristicanan comun, identifica como “famia”, “secta” of “scol” di artenan marcial. Varios deporte a origina principalmente na Hapon, Corea y China.

E artenan marcial ta sistemanan codifica y tradicionnan di combate cu ta ser practica pa un serie di rason, manera e autodefensa; militarnan y di aplicacion di ley; competencia; desaroyo fisico, mental y spiritual; entretenimento y preservacion di patrimonio cultural inmaterial di un nacion.

Kung Fu – e arte marcial Chines aki, tin dies estilo. Hopi biaha nan ta carga nomber di animalnan, manera Monkey Kung Fu y Praying Mantis Kung Fu.

China tin un historia di tradicionnan di arte marcial largo cu ta inclui algun shen di estilonan diferente. Nan a desaroya hopi estilo distinto, cada un cu su propio set di idea y tecnica.

Tin estilonan cu ta imita movimento di animalnan y tin otronan cu ta colecta inspiracion den varios filosofia, mito y leyenda Chines, aunke, cu e formanan den artenan marcial Chines ta destina pa representa tecnica marcial realistico. Tin hopi forma cu a keda elabora, pa asina por ofrece un miho preparacion pa combate y of pa por duna un bista mas esteticamente agradabel.

Na Aruba tin varios grupo of club cu ta practica arte marcial Chines.

Tai Chi – conoci como e “arte marcial suave” (practicanan tecnico den “movecion lento”) –

ta popular aki y ta hopi hende ta practica esaki principalmente pa haya beneficionan di salud.

Te dia di awe nan ta uza e Artenan Marcial Chines den industria di entretenimento y e influencia den pelicula y programa di television ta grandemente bibito den tur pais di mundo.

E serie di stampia ta obtenibel na e oficinanan di Post Aruba, respectivamente na Oranjestad y San Nicolas.

Pa mas informacion tocante e stampia “ARTE MARCIAL 2020” por tuma contacto cu Departamento Filatelico di Post Aruba N.V., cu ta situa na J.E. Irausquinplein 9, Oranjestad, cu su number di telefon 528-7678, of bishita su pagina di Facebook Aruba Stamps.