Post Aruba no tin cu paga su trahadornan un aumento anual di 105 florin anual na januari mas. Esaki segun e vonnis cu hues a duna siman pasa den kort geding entre pa Post Aruba contra sindicato Seppa.
“E compania estatal ya ta failliet pa varios aña, no ta generando ganashi mas y no tin derecho di existencia mas. Un aumento di salario no ta rasonable ni husto.”
Manera portal noticiero Antiliaans Dagblad ta reporta, Post Aruba y e sindicato tabata un CAO pa e periodo di 2010 pa 2013. Despues di esaki no a firma un CAO nobo. Den e CAO cu a caduca, ta poni cu e salario di e trahadornan ta mira un aumento anual di 105 florin na januari. Pero for di e vonnis por nota cu Post Aruba a stop e CAO dia 28 di augustus di 2013. A pesar di e cancelacion, e empresa estatal a continua pagando e aumento di salario acorda tur aña di 2014 pa 2020. Post Aruba a stop cu esaki en realidad na januari 2021 pasobra e situacion financiero no tabata hacie posible mas, segun AD ta publica. Post Aruba a comunica esaki na Seppa verbalmente.
Algun di e trahadornan a tuma e decision pa trece un caso den corte. Hues a trata algun di e casonan substantivo (bodemzaken) na juli ultimo y a dicta cu e CAO cancela ta keda na vigor tanten cu no completa e negociacionnan pa un acuerdo nobo entre e partidonan.
Post Aruba mester keda paga e aumento di salario. Hues tambe a dicta cu e compania di post haci fout door di no informa e trahadornan cu ‘un aumento di salario anual y infinito’ no tabata rasonable ni husto mas pa motibo di e situacion financiero di Post Aruba. “E compania ta failliet pa varios aña caba y ta teni na bida door di Pais Aruba.”
Post Aruba a dicidi pa presenta un procedemento sumario (kort geding) pa motibo cu e compania no por aumenta e salarionan mas. E peticion di Post Aruba tabata pa no ta obliga mas pa aumenta e salarionan di e personal cu 105 florin bruto.
Segun hues, for di cifranan anual por conclui cu Post Aruba ya ta failliet pa añas y no tin derecho di existencia mas. Post Aruba desde 2013 no ta generando ganashi mas, y pio ainda, ta generando perdida tur aña. Post Aruba ta ser teni na bida artificialmente door di su unico accionista, es decir, Pais Aruba. Pa hues, e argumento aki ta mas pisa cu e argumentonan di e sindicato, cu ta tene su mes na e CAO caduca.
Hues tambe a dicta cu for di 1 di januari 2022, Post Aruba no tin obligacion mas pa aumenta e salarionan anualmente den luna di januari cu 105 florin.
