Den e rapport reciente di CAft a comenta na varios momento e impresion cu tin cu cierto empleadonan publico ta asina enfoca riba traha overtime, cu nan ta cuminsa considera esaki como un parti structural di nan entrada.

Den caso di Cuerpo Policial hasta a ser bisa cu tin persona cu a haya prestamo a base di e entrada aumenta aki y cu por lo tanto mester percura pa nan traha overtime tambe. CAft a investiga, te unda por, e posible relacion entre AO y overtime, unda no ta keda cla, cu e datonan disponible, kico ta causa y kico ta consecuencia.

Un aspecto cu no tabata parti di e investigacion tabata e posible relacion entre traha overtime y e hecho di tin debe cu no por paga. Esaki den cierto caso ta conduci na beslag riba salario, algo no incomun tanto na Aruba en general, como tambe den aparato publico. Es mas, e ta un fenomeno general cu na hopi pais a conduci na esfuerso gubernamental pa yuda esnan den situacion sin perspectiva pa motibo di debe, cu por hiba nan na perde tur nan propiedad y keda tira den pobresa.

Bon Dia Aruba a logra haya un resumen di e situacion di beslag riba salario, cu ta data di october 2017. Ta di spera cu desde e tempo ey e situacion a mehora, pero en general e tipo di dato aki ta keda bastante stabiel a traves di aña. Di e estadisticanan cu nos a haya, por deduci cu di e 333 ambtenaarnan cu na october 2017 tabatin un embargo (beslag) riba nan salario, 135 tabata pertenece na ministerio di Husticia, cu ta lidera e lista. Ta sigui ministerio di Asunto General (Prome Ministro) cu 49, ministerio di Enseñansa y Famia, cu 46, y ministerio di Finanzas y Organisacion Gubernamental, cu 44. E demas ministerionan tabatin cantidad hopi menor, E top 5 menciona aki tabata bon pa 274 di e 333 beslagnan haci na departamento di Finanzas.

Di e 135 personanan cu beslag riba salario na ministerio di Husticia, 44 tabata traha na KPA, 23 na CEA, 23 na KIA, y 11 na Brandweer. Na Finanzas tin 14 di Douane y 11 di Belastingdienst. Personal di Bureau di Ministerio di Asunto General, di Prome Ministro anterior, tambe tabatin 11 beslag. Nos por observa cu e cuatro entidadnan analisa den e rapport di CAft ta figura tambe den e top di beslag riba salario, cu KPA como esun cu mas beslag, loke riba su mes no ta remarcable, ya cu ta trata di e departamento mas grandi di e cuatronan aki.

Kico lo mester ta e conclusion preliminar den e asunto aki? Nos por observa cu na e ministerio cu mas problema di AO y overtime, esun di Husticia, tambe ta señala presencia di 101 (30% di total) di e beslagnan na entidad perteneciente na e ministerio, incluyendo tambe CEA, cu no tabata parti di e analisis di CAft. Ta mira aki un trabao importante pa duna guia na personal den problema cu ta relaciona cu salud y overtime, pero lo mester tuma na cuenta tambe e aspecto aki di debe personal cu ta bay for di man y cu por tin influencia riba trabao. Ademas mester menciona e situacion di vulnerabilidad den cual empleadonan publico por ta pa loke ta integridad, ora nan tin problema financiero dificil di atende.