Den cuadro cu celebracion di nos himno y bandera riba 18 di maart, tin hopi actividad durante luna di maart cual ta un luna cultural. Departamento di cultura kier a haci un yamada na tur esunnan cu ta participa na e desfile di dia 18 di maart pa sea asina bon di tuma contacto cu nan, y tambe un recordatorio pa inscribi na tempo pa locual ta e feria cultural.

Pa informacion riba inscripcion pa locual ta e desfile di 18 di maart, por cuminsa na tuma contacto cu departamento di Cultura na 582 2185 y puntra pa Chencho Kelly of mand’e un e-mail na permusic13@hotmail.com. E biaha aki sr. Kelly ta encarga anto ta conseha pa esunnan cu lo participa cuminsa haya e informacion for di trempan. “E ta un desfile di e gruponan di autoridad, social, cultural, scouting, e ta un marcha grandi cu a bira cu Aruba ta semper ansioso pa mira su hendenan uniforma den unidad. Y sa tur kico ta esunnan cu ta traha den autoridad of den forma boluntario na Aruba. Ta casi 4.000 hende tin ariba pia cu entre 40 grupo cu ta participa”, Stan Dabian di departamento di cultura ta bisa.

Feria Cultural
Na tur esunnan cu ta interesa pa participa na e mercado of e feria cultural, e biaha aki cu e dos festivalnan infantil y hubenil lo ta riba 2,3 y 4 di maart na Entertainment Center. Esun grandi lo ta riba 8/9 di maart anto e final lo ta riba 11 di maart. Tambe e manifestacion cultural lo ta riba 17 di maart na Plaza Betico Croes.

Pa esunnan cu ta interesa pa bende cuminda of cos dushi y artesania, por tuma contacto cu Marlene Lampe na departamento di cultura riba mesun number ariba menciona pa ta sigur cu lo por haya un tent. E entrada pa tur e actividadnan aki manera semper ta completamente gratis pues henter pueblo di Aruba ta wordo invita pa apoya cantantenan,artista y gruponan y tambe esunnan cu ta bin pa e feria cultural. “E interes ta grandi. Y mi ta kere e aña aki debi cu ta na Entertainment Center mi ta kere lo tin posibilidad pa tin mas tent. Mirando cu riba Plaza Betico Croes ta te mas o menos 20 nos lo por pone. Kiermen e ora ey wak pa bo inscribi na tempo pa bo haya bo tent y participa na e feria cultural.”