Despues cu presidente di Peru, Pedro Pablo Kuczynski a solicita na presidente Donald Trump pa evalua e deportacion di Toledo pa Peru, a investiga si e proceso ey ta posibel of no.
Abogado penal Julio Rodriguez a bisa “ mi ta kere cu deportacion no por den e caso aki. Deportacion ta un accion cu un pais ta tuma di manera liber, relaciona cu un persona cu tin algun problema migratorio o cu a comete algun delito na su pais. E situacion aki no ta e caso di Toledo. Pesey Merca no tin ningun motibo pa ehecuta un deportacion”.
Rodriguez a bisa cu autoridad Mericano mester tin e informe cu tur motibo di banda di Peru pa detene Toledo, y anto Merca por detene di manera temporal y despues traha riba un posibel extradicion. Interpol no ta detene ningun hende. Interpol su funcion ta di intermediario entre polis local cu ta duna orden di captura y polis di pais cu ta solicita un persona, den e caso aki, Peru cu ta solicita Toledo.
Peru ta spera cu ex-presidente Alejandro Toledo, cu ta solicita pa autoridadnan, pa motibo di a haya soborno for di e empresa di Brasil Odebrecht, por keda deteni na Merca y asina no por huy pa otro pais manera Israel. Sin embargo, Israel a afirma cu nan no lo bay laga Toledo drenta nan pais. Autoridad di Peru ta kere cu Toledo ta na San Francisco y e ministro di interior Carlos Basombrio a confirma e posibilidad cu e por biaha pa Israel, pais di cual su muhe Eliane Karp tin ciudadania.
“Nos a haya sa cu Toledo tabata purba di huy pa Israel y nos a duna un alerta na Israel. Nos a haya sa e vuelo riba cual ta purba bay tambe”, Basombrio a splica. Gobierno di Israel via su vocero di ministerio di exterior, Emmanuel Nahshon, a bisa cu Toledo ta autorisa pa drenta Israel, ora cu e soluciona tur su asunto cu Peru”.
