En conexion cu e proyecto RECIP IV, riba diahuebs y diabierna dia 3 y 4 di augustus ta tuma luga modificacion di e sistema di control di frecuencia den planta di generacion di coriente di WEB. E proceso ta encera ehecucion di varios test di e reaccion di e motornan y na final un test riba e planta completo.
Segun WEB a informa a traves di un comunicado di prensa, ta necesario sigui cu testmento pa por confirma e debido funcionamento di planta RECIP IV. Semper ta keda existi un posibilidad minimo cu por surgi interupcion di coriente mirando e magnitud y riesgonan envolvi cu e trabao. E departamentonan di Produccion, Aplicacion y Instrumentacion di WEB en cooperacion cu partner Wärtsilä, lo tuma tur precaucion y coordina e trabou di tal forma pa evita cualkier incidente of interupcion di coriente.
Alerta pa calor excesivo
Por bisa cu e testnan di WEB, maske necesario, no ta yega na e miho momento. E siman aki, Meteo Aruba a emiti un aviso pa calor excesivo debi cu ta acercando e parti di mas calor di aña.
Segun Meteo, nos ta acercando e temporada di aña cu lo bay sinti mas calor cu normal. Esaki ta e lunanan di augustus, september y october. E combinacion di temperatura halto y porcentahenan halto di humedad, ademas di un biento de vez en cuando menos fuerte cu normal, lo pone cu por sinti malestar.
E temperaturanan maximo di e siguiente lunanan lo por varia di 34°C (93 F) pa 36°C (97 F), mientras cu e porcentahe di humedad entre 85% te 90% of mas lo contribui na un indice di calor (temperatura aparente) rond di 43° C (109 F) te 46° C (115 F) cada dia.
E calor y humedad halto lo no baha mucho anochi, cu temperatura bahando solamente te un minimo di 28°C (82 F) te 29°C (84 F). Esaki lo aumenta e peligro pa hendenan cu no por haya un lugar adecua pa refresca nan curpa.
Calor excesivo ta e asesino number 1 relaciona cu clima. Hende mester ta prepara pa e peliger cu calor excesivo ta ocasiona. Mucha chikito, hende grandi y hende cu malesa di curason ta esnan mas exponi. Meteo ta recomenda pa limita actividad pafo di cas pa oranan trempan di mainta of ora solo baha. Si tin airco, pa haci uso di esaki, of a lo menos habri bentana pa laga aire pasa y circula.
Accion di precaucion
Un aviso pa calor excesivo ta nifica cu un periodo di temperatura halto ta wordo spera.
E combinacion di temperatura y humedad halto lo combina pa crea un situacion den cual malesa causa pa exposicion prolonga na temperatura halto lo por presenta. Meteo ta recomenda pa bebe hopi likido, keda den camber cu airco (ora cu ta posible), keda aleha for di solo y ademas bisti paña licht di color, preferiblemente blanco.
