Durante un entrevista na radio Top FM Hans Geerman a haci premier Evelyn Wever-Croes pregunta riba e lista di biahenan di Ministernan cu ta circulando. E lista aki ta duna no solamente un cantidad irealistico di biahenan haci pa cada Minister, pero tambe sumanan exagera mirando cu cada Minister tin un presupuesto pa aña pa haci biahenan di trabou.

Den un comunicado, Prome Minister Wever-Croes a amplia riba e procedura di biahenan di ministernan y a indica tambe e fuente for di unda e informacion robes tocante e biahenan a bin, cu ta for di opositornan politico den Parlamento.

E lista cu ta circulando rond tocante e biahenan di Ministernan ta un bruhamento di tera atrobe cu fin politico. E lista ta bruha biahenan priva y biahenan di trabou den otro, siendo cu ningun biahe priva di Ministernan di Gabinete Wever-Croes ta cubri pa gobierno.

‘Mi no sa si den temporada di gobierno di AVP esey tabata pasa, pero den mi gobierno esey no ta e caso. Pues e Ministernan ta paga nan biahenan priva nan mes. Tur Minister tin derecho riba vakantie y tin Minister cu ta haci biahe relaciona cu nan salud’, Premier Wever-Croes a enfatisa.

Premier Wever-Croes a enfatisa tambe cu tin un procedura pa cu e biahenan di Ministernan. Segun regla, cada biaha cu un Minister no ta na Aruba, mester pone Gobernador di Aruba y Parlamento di Aruba tambe na altura; esaki ta conta tambe pa biahenan priva. Riba e lista cu Parlamento ta ricibi, ta indica claramente e biahenan di trabou y biahenan priva. Y cada Parlamentario por wak esaki, pero esaki no kier men cu gobierno ta paga ambos biahe.

Gobierno ta paga solamente biahenan di trabou. Ta di lamenta cu Parlamentarionan di oposicion ta purba bruha tera un biaha mas y informa pueblo un biaha mas cu mentira, mientras cu nan ta na haltura di e procedura aki. Esaki, segun premier Wever-Croes, ta un forma hopi inmadura pa anda cu informacion cu Parlamento ta ricibi riba asuntonan serio cu fin politico.

‘Mester reevalua procedura di meld biahe na Parlamento’
“Awor cu ta obvio cu oponentenan den parlamento no por anda na forma madura cu informacion cu Parlamento ta haya, nos mester reevalua e procedura aki. Tambe cada biahe di trabou, e Minister ta bay Conseho di Minister pa haya aprobacion y ta splica e motibo di e biahe. Cada Minister tin un presupuesto di biahe cu e mester tene su mes na dje. Pues no ta asina cu ‘the sky is the limit’. Esaki por tabata asina den e gobernacion anterior, pero Gabinete Wever-Croes ta un gobierno serio y ta tene su mes na regla y proceduranan di biahenan di trabou pa nos Ministernan”, Premier Wever-Croes a duna di conoce.