Recientemente sr. Luis Oduber a keda nombra como director di e compania di utilidad WEB, despues cu el a fungi pa varios luna como director interino. Sr. Oduber a bisa cu den su funcion den prome luga nan a mantene e compania aki pa suministra nos comunidad cu coriente stabiel y awa di bon calidad tambe.
Na januari ultimo sr. Oduber a wordo nombra como director permanente di e compania di produccion di awa y coriente aki. E tin hopi proyecto y ideanan cu ainda e tin cu papia cu su team di maneho pa implementa nan. Pero no solo ideanan sino retonan y reapertura di refineria ta un di nan. Sr. Oduber a bisa cu WEB mester percura di abastece cu mas awa y coriente e refineria na San Nicolas.
Pero e ta sinti su mes confia, ya cu den pasado nan a yega di confronta cu exito hopi reto. “Manera boso nan sa nos a pasa un aña hopi dificil, pero nos a termina esey hopi exitoso”, el a bisa. El a gradici pa e logro aki na e trabou duro cu e 317 empleadonan di WEB a realisa. E ta bisa cu ainda nan no a yega na nan metanan, pues ainda nan tin hopi trabou pa haci y retonan pendiente.
Sostenibilidad y energia renobabel
Pero ainda WEB tin otro proyectonan mas cu nan ta evaluando riba tereno di sostenibilidad y energia renobabel. Algun di nan ta den ehecucion aworaki y otronan mas den futuro. Tambe nan ta biniendo cu mas capacitacion pa su personal cu mas training pa recapacita nan personal. Igualmente nan ta evaluando nan ekiponan pa nan keda opera optimalmente.
“Pasobra nos meta ta keda semper na prome luga eficiencia pa reduci e consumo di fuel oil”, el a bisa. Otro prioridad tin di haber cu e produccion y aumento di energia renobabel pa saca e mayor probecho di nos recurso natural di solo y biento. Tambe e ta habri pa cualkier tecnologia cu lo por presenta den futuro semper y cuando ta cumpli cu nan filosofia base riba tres punto: E suministro di awa y coriente mester ta stabiel. E di dos, tur proyecto no mag bay a costo di aumento di tarifa. E di tres ta cu e mester ta un produccion sostenibel na termino largo.
