Algun tempo atras e Prome Minister a declara cu niun hende cu tabata forma parti di e ministerionan maneha pa Otmar Oduber lo keda retira pero awe ta mustra di ta diferente. Tur comisario cu ta(bata) forma parti di un N.V. maneha door di e ex Minister a haya carta di retiro durante dia di awe. Esaki a cay manera un sorpresa pa cada un di e profesionalnan aki ya cu cosnan tabata den ‘viento en popa’ cu mayoria di e N.V.nan.
E ex mandatario tabata maneha un total di cuater N.V. estatal cual tabata ATA, AruBus, ANSA y AAA. Kico exactamente lo a conduci na e retiro repentino aki no ta conoci ya cu ta trata di personanan cu ta hunga un rol importante den board di cada un di e companianan aki. Un di e personan cu a keda retira a bisa Bon Dia, “Esaki ta nada otro cu persecusion politico. Bo no ta kita un persona for di trabou mientras e ta cumpliendo cu su debernan.” E persona ta sigui bisa, “E cos ki no ta coincidencia paso ta tur di nos cu a traha bou di maneho di Otmar a wordo retira.”
Bon Dia Aruba a logra haya un bista di e carta y notabel di esaki tabata cu a gradici e personan pa nan trabou y deseanan suerte pa futuro. Bon Dia Aruba a tuma contacto cu sr. Oduber kende a bisa cu enberdad e la ricibi varios yamada pero no por duna mucho comentario ainda paso e no sa kico exactamente ta pasando. Aunke e reaccion tabata den un forma corto, e ex mandatario ta splica cu esaki no ta cay como un sorpresa, mirando cu ta varios di esnan cu a forma parti di su ministerio a keda retira. Oduber a termina bisando “Tur e empresanan estatal aki tabata tin hendenan capacita den nan hunta di comisario y unda sigur tres di e cuatro empresanan aki ta genera ganashi bruto, sigur mas cu antes, pa gobierno.”
Bon Dia Aruba lo tuma contacto cu e minister encarga awor cu e N.V.nan aki y lo ta en espera di un reaccion oficial di e ex mandatario.
