Relaciona cu tur locual ta pasando rond di minister Paul Croes a bin dilanti un scenario fastioso unda e partido mas grandi den oposicion ta pidi retiro voluntario di e mandatario of lo yama un reunion urgente pa entrega un mocion di desconfiansa contra su persona.
Segun nos a compronde, lo a duna e minister 48 ora pa por regla su retiro sino lo bay over na tuma pasonan necesario. E partido MEP ta haya cu no ta na su lugar cu un persona cu ta sospechoso den actonan bochornoso por sigui carga un tarea den dirigi asuntonan di nos pais. Ayera tardi tabata tin un reunion entre e mandatario cu ta wordo sospecha cu mas colega pero no sa ainda si esaki lo tin di haber cu su retiro.
Reaccion AVP
A tuma contacto cu partido AVP pa wak con nan ta para cu e situacion aki pero no a logra haya contacto ainda. Asina cu tin un reaccion, Bon Dia Aruba lo publica esaki.
Reaccion POR
A tuma contacto cu un di e lidernan di partido POR, sr. Otmar Oduber, mirando cu tin dos miembro di parlamento cu actualmente ta den e partido nobo aki. No a haya un contesta directo di con nan ta para pa cu un mocion di deconfiansa contra minister Paul Croes pero a referi na e comunicado. Segun un comunicado emiti pa e partido, “posicion di POR den e caso di acusacionan fuerte den direccion di Minister Paul Croes ta hopi cla. Gobierno, cq Minister President su posicion pidiendo algun ora pa tanto Minister Croes y Gabinete Mike Eman II tuma un decision pa loke ta nan siguiente pasonan a vence. Nos plataforma ta para fuertemente pa un maneho integro, transparente y sin ningun tipo di duda.”
E comunicado ta sigui bisa, “Pa por tin un gobernacion integro e paso mas logico ta cu Minister Croes mester pone su cartera disponibel mientras cu e investigacion penal riba otorgamento di permisonan laboral ta finaliza. Gobernacion di un pais ta algo hopi serio y na momento cu tin un investigacion penal riba un di e ministernan (sospechoso) cu ta conforma dicho Gobierno, integridad di no e gobierno, pero di full Pais Aruba ta wordo poni den duda.”
