(AP) – Critica e famia Kardashian ta un pasatempo comun pa varios Mericano. Riba dialuna, algun a haya e oportunidad di haci esaki den nan cara.

Kim Kardashian, su mama Kris Jenner y su rumannan Khloe Kardashian y Kylie Jenner a sinta den primera fila na sala di corte den Los Angeles, mientras cu prospectonan pa hurado a expresa nan sentimento tocante e famia aki y e 4 muhenan presente, en relacion cu Rob Kardashian su ex pareha Blac Chyna su demanda.

“Cualkier cos cu tin di haber cu nan nomber ta ricibi un no for di mi,” un homber a bisa. “Mi no ta kere cu e tipo di programanan aki ta bon pa sociedad.”

Chyna, ken su nomber legal ta Angela White, ta demandando e famia Kardashian pa motibo cu supuestamente nan a destrosa su carera riba television, y durante e seleccion di hurado su abogado Lynne Ciani a pidi decenas di candidato tocante nan sentimento relaciona cu e acusado y e defendientenan, y tambe e programa di unda e demanda a sali.

Otro persona a bisa “mi ta spera sinceramente cu ningun di e personanan aki bira mas rico pa causa di esaki.”

Un muhe a bisa cu su yiu muhe a purba di wak e programa “Keeping Up With The Kardashians” ora cu esaki a cuminsa riba television, pero el a pone un stop na esaki. “Mi no ta kere cu nan ta e miho ehempel,” e muhe a expresa. “Mi no lo laga mi yiu mira nada cu ta involucra e famia aki.”

Un miembro di e panel no por a warda pa ser puntra. Ora cu a bisa su persona pa provee su informacion personal, el a contesta y a agrega cu “mi tin un percepcion hopi negativo tocante ambos partido involucra, y mi no ta kere cu mi lo por ta un persona imparcial.”

E defendientenan no a aparenta di ta defensivo ni ofendi pa e falta di respet. Nan a papia cu otro y hasta hari durante break, sinembargo Hues Gregory W. Alarcon tabata disgusta cu e tono.

“Mi ta aprecia bo honestidad. Ciertamente bo no ta un persona timido,” el a bisa e panel. “Pero esaki ta e tipo di caso cu manera tur otro caso, tin hende cu e derecho di un huicio husto. Tin un instruccion na e hurado cu e rikesa of pobresa di e partido no ta di importancia.”

Seleccion di hurado ta premira di sigui diamars. E muhenan Kardashian ta premira di testifica durante e huicio, y ta premira cu lo atende na por lo menos algun parti di esaki, sinembargo nan presencia durante seleccion di hurado tabata un poco sorprendente.