(AP) – Mas di 100 candela di mondi a pusha miles di bombero te na e limite den noord di Portugal. Shete persona a muri desde diaranson, ora cu e pio brote di candela den e ultimo añanan a cuminsa.
Prome minister di Portugal, Luis Montenegro, diamars ultimo a declara un estado di desaster den e zonanan mas afecta y a yama instancianan pa mobilisa mas bombero y funcionario. Tambe el a haci un yamada na investigadonan policial pa redobla nan esfuersonan pa haya esnan cu a cuminsa e candelanan y a priminti yudansa na esnan cu a perde nan cas of a ser evacua.
“Nos ta hopi consciente cu e oranan dificil aki no a caba,” Montenegro a bisa den un mensahe televisa na e pais. “Nos tin cu sigui duna tur loke nos tin y nos ta pidi nos partnernan y amigonan yudansa pa asina nos por fortalece e proteccion di nos hendenan y propiedad.”
Servicio di monitoreo di satelite Copernicus di Europa a bisa cu pa diamars anochi alrededor di 15.000 hectar a kima y un total di 13 kilometer (8 miya) candela a keda detecta. E vlamnan a menasa un zona unda 210.000 hende ta biba, el a agrega.
E condicionnan seco y cayente cu a conduci na candela na Portugal a coincidi e siman aki cu inundacion na Europa central. Union Europeo a bisa ayera diaranson cu e sucesonan extremo competitivo tabata evidencia di un “destruccion di clima.”
Miembronan di UE manera Spaña, Francia, Italia y Grecia cada un a priminti di manda dos avion cu ta baha awa pa yuda bomberonan Portugues. Ehercito Spaña tambe a manda 240 soldaat y vehiculo di su Unidad di Emergencia Militar specialisa den combatimento di candela pa e pais bisiña.
Huma shinishi y holo di palo kima a yega te na e frontera cu noordwest di Spaña, mas o menos 85 kilometer leu.
Montenegro a haci un yamada special na forsanan di seguridad pa busca cualkier hende cu negligentemente a cende un candela. Polis nacional Portugues a bisa cu nan a detene shete homber sospechoso di a cuminsa candela di mondi den e ultimo dianan. Autoridadnan a prohibi uso di ekipo di agricultura pisa pa reduci e riesgo di cuminsa candela accidentalmente.
Un di e zonanan mas afecta tabata e districto di Aveiro, zuid di e ciudad nort di Porto, aunke tambe tabatin candela grandi for di control den otro zonanan di boske.
Autoridadnan ainda no a duna cifranan di daño na propiedad, pero television estatal RTP a mustra imagennan di casnan kima den pueblonan rural y di habitantenan di e zona tratando di confronta e vlamnan cu baki di awa, slang y hasta rama grandi. Otro imagennan televisa a mustra e huma oraño cu ta reduci visibilidad na djis algun meter.
Tres bombero a fayece diamars ultimo nan vehiculo y un otro a cay flauw na loke autoridadnan a describi como un “malesa diripiente” mientras nan tabata trahando den fin di siman. Tres civil tambe a muri, segun autoridadnan di proteccion civil a señala.
