Portia de Rossi ta kibra silencio tocante acusacion contra Ellen DeGeneres

Portia de Rossi a duna su prome declaracion publico den sosten di su esposa, Ellen DeGeneres.

E actriz, kende a casa cu DeGeneres na 2008, a laga na cla cu e ta para tras di su esposa, door di post un poster blauw y blanco riba rednan social cu ta bisa ‘Mi ta para cu Ellen’.

“Na tur nos fanatico… nos ta wak bo”, e strea di 47 aña di edad a skirbi riba Instagram. “Danki pa bo sosten.”

E post ta yega despues di reportenan tocante un supuesto ambiente di trabou toxico na The Ellen DeGeneres Show. Despues di varios acusacion di empleadonan actual y den pasado di The Ellen DeGeneres Show, compania mama WarnerMedia a lansa un investigacion interno na juli.

Despues, siman pasa, e anfitrion di 62 aña di edad mes a papia den un memo na su personal.

“Riba e prome dia di nos show, mi a bisa tur hende den nos prome reunion cu The Ellen DeGeneres Show lo ta un luga di alegria – niun hende lo halsa nan voz, y tur hende lo ser trata cu respet”, DeGeneres a cuminsa. “Obviamente, algo a cambia, y mi ta decepciona pa haya sa cu esaki no ta e caso. Y pa esey, mi ta sorry. Cualkier persona cu conoce mi sa cu ta lo opuesto di loke mi ta kere y loke mi tabata spera pa nos show.”

DeGeneres a continua, splicando cu mientras e show a ‘crece exponencialmente’, e mester a mira na otro hende pa maneha nan mes, cual algun empleado no a haci. “Esey lo cambia awo, y mi ta comprometi pa sigura cu esaki no lo pasa atrobe”, el a declara.

Warner Bros. a duna un declaracion na Fox News siman pasa, splicando cu nan ta ‘tuma e acusacionnan recien tocante cultura laboral di e show hopi na serio’.