E portal digital Intriper.com su seccion ‘Work and Travel’ bao e cabes na Spaño: “Aruba está relagalndo estadías en hoteles y descuentos para que puedas vivor y trabajar en la isla caribeña por 3 meses,” a referi na e programa One Happy Workation cu a keda introduci recientemente dor di Aruba Tourism Authority (ATA).
E publicacion digital aki a cuminsa produci tur sorto di comentario, specialmente comentarionan negativo. Directora di ATA, Ronella Tjin Asjoe-Croes a tuma nota di loke e portal aki a publica y nan team lo cuminsa atende cu esaki.
Ayera Tjin Asjoe-Croes a prefera di abstene di duna mucho comentario riba e publicacion aki, ya cu apenas el a wordo notifica di dje. Pero si el a mand’e na e team di ATA cu ta atende cu e sorto di publicacion aki pa haya sa nan reaccion tambe. E ta kere cu e team di ATA ya caba ta na haltura di e publicacion aki.”Mi no tin comentario ainda riba esey,” el a declara na Bon Dia Aruba.
Sinembargo el a mira e comentario haci den e portal digital menciona, y locual e por a saca afo ta cu e programa One Happy Workation ta wordo mal interpreta y “e no ta moviendo bon.” Pero el a laga sa cu e programa aki a wordo diseña exclusivamente pa Merca.
Mirando locual a keda publica den e portal digital, Tjin Asjoe-Croes ta haya cu mester remedia y coregi e otro mensahenan. Encuanto con e programa aki ta moviendo pa Merca, el a bisa cu e ta moviendo hopi bon. “Nos ta mirando hopi interes. Esey si mi por bisa,” el a declara na e matutino aki.
Directora di ATA a afirma cu e programa One Happy Workation ta pa Merca exclusivamente, y no pa Latino America. El a splica cu segun nos leynan, turistanan Mericano por keda na Aruba te cu un maximo di 3 luna. Pues e mesun ley of areglo aki no ta disponibel pa tur otro pais of region. “Pues e ta pa Merca y esunnan cu tin un paspoort Hulandes,” el a bisa na Bon Dia Aruba. P’esey ATA por a lansa e programa aki pa Merca.
