(AP) – Imagennan usando Inteligencia Artificial por ser usa pa crea arte, bisti paña den cambernan virtual y yuda diseña avisonan.

Sinembargo expertonan tin preocupacionnan cu e baña scur di e hermentnan facilmente accesibel por empeora algo cu mas tanto ta causa daño na hende muhe; pornografia falso crea sin consentimento cu inteligencia artificial, e asina yama pornografia ‘deepfake’.

‘Deepfake’ ta videonan y imagennan cu ta crea digitalmente of edita cu inteligencia artificial. Pornografia crea usando e tecnologia aki a cuminsa plama den internet varios aña atras ora cu un usuario di Reddit a comparti videonan unda e ta pone e cara di celebridadnan femenino riba e curpa di actriznan pornografico.

Desde e tempo aki, creadornan di videonan ‘deepfake’ a cuminsa crea videonan similar haciendo uso di e cara di celebridadnan di rednan social, reporteronan y otronan cu tin perfil publico. Miles di video ta existi awendia riba un gran variedad di sitio web. Y algun ta ofrece e usuarionan oportunidad di crea nan mesun video, esencialmente dunando cualkier usuario e oportunidad di converti kien cu nan kier den un fantasia sexual sin nan consentimento of ta provee e oportunidad pa usuarionan usa e tecnologia pa causa daño na ex parehanan.

E problema segun expertonan ta cu awo a bira hopi mas facil crea deepfake sofistica y visualmente convincente. Nan ta di e pensamento cu esaki por bira hopi mas pio cu e desaroyo di hermentnan generativo di inteligencia artificial cu ta crea pa tuma biyones di imagen for di itnernet y crea contenido nobo usando data existente.

“E realidd ta cu e tecnologia lo sigui plama, lo sigui crece y lo sigui bira mas facil,” Adam Dodge, fundador i EndTAB un grupo cu ta provee training riba abuso di tecnologia a expresa. “Y mientras esaki tuma luga, hende indudablemente lo sigui mal usa e tecnologia pa causa daño na otronan, principalmente via violencia sexual online, pornografia deepfake y imagennan sunu falso.”

Noelle Martin di Australia a experiencia e realidad aki caba. E hoben di 28 aña a haya un video pornografico ‘deepfake’ di su persona 10 aña atras ora cu pa curiosidd el a busca su potret riba Google. Te cu dia di awe, Martin ta bisa cu e no tin idea di ken a crea e imagennan falso ni videonan di su persona. E ta sospecha cu probablemente nan a tuma un potret cu el a publica riba su rednan social y a usa esaki pa crea e pornografia.

“Bo no por gana,” Martin a splica, contanto cu el a contacta varios sitio web pa nan kita e imagenna di su persona, y algun a kita e videonan mientras otronan no a contesta y riba varios di e sitionan web aki el a bolbe mira e video publica despues cu nan a kita esaki caba. “Esaki ta algo cu semper ta bay keda eyfo. E ta aruina bo persona pa semper,” el a agrega.

Eventualmente, Martin a mira den direccion di legislacion, bogando pa ley nacional na Australia cu lo duna companianan un boet di 370,706 dollar si nan no cumpli cu kita e videonan reporta cu e tipo di contenido aki for di reguladornan di siguridad online.

Sinembargo gobernacion riba internet ta practicamente imposibel mirando cu cada pais tin su mesun leunan pa cu contenido cu ta crea hopi biaha na otro banda di mundo. Martin ken actualmente ta un abogado y investigador legal na University of Western Australia ta bisa cu e ta kere e problema mester keda controla cu un tipo di solucion global.

Mientrastanto, algun modelonan di Inteligencia Artifiical ta bisa cu ya caba nan ta combatiendo acceso na imagennan ilicito.

OpenAI a bisa cu nan a kita contenido ilicito for di e data cu ta usa pa train e herment di genera imagen yama DALL-E, cual ta limita e habilidad di usuarionan den crea e tipo di imagennan aki. E compania tambe ta filtra peticionnan y ta bisa cu esaki ta blokia cualkier peticion di usuario cu ta crea imagen di celebridadnan of politiconan prominente. Midjourney, otro modelo, ta blokia e usuario di usa cierto palabranan clave y ta encurasha e usuarionan pa reporta imagennan problematico na e moderadornan.