Porfin e momento supremo a yega cu autoridadnan di salubridad publico a bay prensa cu e anuncio cu tin (tabatin) un epidemia di Zika. Como unico medio di comunicacion, tempran den e proceso caba, Bon Dia Aruba a ‘pick up’ e señalnan cu e situacion rond di e enfermedad contagioso Zika no tabata mustra bon.
Naturalmente nos a ripara cu ningun otro medio no tabata sigui o no tabata interesa den e tema. Of por ta cu e reaccion di e autoridadnan tabata suficiente pa calma nan posible interes.En todo caso, nos a keda riba e caso. Logico tambe, pasobra e señalnan di e seriedad di e caso tabata keda bin. Y pakico esey ta sucede? Pasobra nos ta un medio di comunicacion y e canalnan di informacion ta diverso, riba cualkier tereno. No ta cuestion cu nos ta consulta cu e portavoz oficial y nos ta cla. Hopi di e señalnan ta bin semper for di ‘den tereno’. Un sector medico ta hopi mas cu e departamento di salubridad publico y e despacho di e ministro concerni, cu tur respet. Y nos no ta investiga cu e meta premedita pa proba cu e informacion oficial, si acaso nos haye, no ta veridico. Nos ta pone tur informacion hunto y ta saca conclusion, segun conocemento y consenshi, y nos ta publica.
Pero, pa un debate sano riba e asunto aki, ban bolbe na e inicio di e proceso. Tur pais rond di nos tin problema considerable cu e enfermedadnan propaga pa sangura manera Zika, Chikungunya y Dengue. E problemanan tabata grandemente presente caba cerca nos bisiñanan mas cercano. Kico tabata di spera anto riba un isla turistico cu ta haya un par di miyon di persona cu ta drenta e isla anualmente? Cu e malesa aki lo a bay yega aki tambe, punto. Ora cu despues di un temporada bastante largo di secura, nos a haya fin di 2016 un tremendo temporada di yobida fuerte, tabata logico cu e casonan di e tres enfermedadnan menciona lo a aumenta drasticamente, incluyendo mas probabilidad di Zika.
Despues a bin atrobe secura, cu por resulta engañoso, den e sentido cu no tin plas di awa tur caminda mas, pero e peligro di criadero di sangura cerca di cas ta keda. Mas cu fumigacion den biento di cuaresma, ta aki cu naturalmente mester tabatin un esfuerso continuo pa conscientisa nos ciudadanonan cu nan tin den nan mes man e instrumento principal pa preveni e enfermedadnan transmiti pa sangura. Nos no ta bisa cu e autoridadnan concerni no tabata prepara completamente pa loke por a bin. Pero e proceso manera el a bay a trece na luz di dia algun, laga nos yamanan ‘imperfecto’ den entre otro e sistema di registracion.
Un aspecto cu sigur merece mehoracion, dentro di lo posible, ta cu e registracion tin un ‘time lag’ aden. Esey ta e caso cu tur tipo di recoleccion di informacion; no ta e idea pa culpa hende pa esaki. Pero si e ta normal tambe, den cualkier tereno di gobernacion, cu mester tin un esfuerso pa supera e nivel di eficiencia y efectividad cu tin na cierto momento. Pa simplemente ta miho prepara e siguiente biaha, pa asina por haci un miho trabao, na interes general. Tur profesional, riba cualkier tereno, mester tin e afan aki di supera su mes riba un base continuo.
Awor, den e caso cu nos ta discuti, tabata posible pa acelera e recoleccion di dato, na momento cu a ripara cu e situacion tabata mas serio cu e tabata mustra na prome momento? Si nos ta comprende bon, e docternan di cas ta comunica via un sistema automatisa, cu en principio ta duna e posibilidad di un fluho di informacion riba tur dia di trabao, manera cu nan comproba un caso. Den e acumulacion y analisis di informacion ta asina cu no ta necesario semper pa warda fin di luna yega, pa bay wak kico tin… Den caso cu por spera problema, sigur ta recomendable pa purba ‘speed up’ e proceso, y en todo caso purba mira e situacion cada dos siman, o miho ainda cada siman. Pero esey ta tarea pa esnan na e punto central mes cu ta ricibi tur informacion y mester analisa esakinan. Den un caso asina, un posible epidemia ta suficiente urgencia, no por bay sinta warda burocraticamente pa fin di luna yega? Of e custumbernan profesional aki ainda no a bira bien comun ainda den e departamento?
Contal cu nos ta keda para riba nos opinion cu tabata posible pa anticipa miho kico tabata na caminda y cu for di e cifranan preliminar, contrario na e reportero di Bon Dia Aruba, e autoridadnan no tabata dispuesto pa saca e conclusion cu tabatin un caso di epidemia. Awor cu finalmente nan a yega na e conclusion cu e corant tabatin razon for di inicio, no ta na su lugar ningun comentario agrio di e mandatario, cu nos lo mester limita nos mes na papia cu e berdadero autoridadnan… Nos ta keda mantene nos maneho di recoleccion liber y amplio di informacion.
