Imsan, Ibisa, Botica di Servicio y plataforma promocion di salud conhuntamente ta organisa riba diadomingo un walk & run en conexion cu World Diabetes Day.

Adrienne Tromp, boticario na Botica di Servicio ta conta nos durante un conferencia di prensa na Instituto Biba Saludabel y Activo (Ibisa) cu diabetes ta un problema grandi na Aruba. Por ilustra e situacion aki pa medio di e cifra cu sra. Tromp ta duna nos: 16.2% di populacion di Aruba ta sufri di e malesa aki. Esaki compara cu e porcentahe di 8.3% mundialmente ta hopi halto, segun sra. Tromp.

 Pa e motibo aki diferente organisacion y instancia manera Ibisa, plataforma promocion di salud di Departamento di Salud (DVG) y Imsan ta traha hunto pa trece conscientisacion y cuido relaciona cu e malesa aki. Ta trata aki di diabetes tipo 2, cual ta e malesa cu en general ta esun cu por surgi durante bida di un persona. Esaki compara cu diabetes tipo 1 cual mas tanto ta wordo hereda via familiarnan cu e tin e malesa.

Diabetes ta ora un persona su curpa tin nivel halto di sucu den nan sistema, cual ta haci cu e persona su curpa no ta procesa esaki manera debe ser. E risico pa haya diabetes ta halto segun sra. Tromp pa personanan di edad, si bo tin un persona den famia cu e malesa y specialmente si ta sufri di sobrepeso.

Un di e consecuencianan cu por bin pa personanan cu e malesa ta cu e persona por haya heridanan na nan pia cu no ta cura lihe, tanto como problema cu curason y problema cu wowo. Algun manera cu bo por haya sa cu bo tin diabetes ta si bo ta nota cu bo ta orina hopi, ta haya hopi sed, ta haya hamber frecuentemente, sinti cansancio, wak wazig of si a baha peso den corto plaso pa ningun rason, segun sra. Tromp.

“Pa diabeticonan ta hopi importante pa biba saludabel. Sigur mester purba cana mei ora cada 5 dia den siman y ta bon pa come fruta y berdura. Tambe ta hopi importante pa bo tuma e remedinan cu ta prescribi pa bo dokter tur dia ora esaki wordo prescribi.”

Riba e punto aki director di Ibisa Monique van Embden a elabora un poco mas, mirando cu nan di Ibisa ta mira hopi biaha riba nan Bus di Salud cu tin hende cu sa cu nan tin diabetes pero conscientemente no ta tuma nan remedi manera debe ser. “Hopi biaha nan ta bisa nos cu nan ta tuma e remedi solamente ora nan ta sinti malo. E punto ta cu si bo sa cu bo ta diabetico bo tin cu sigui e tratamento cu bo dokter di cas ta prescribi. Bo no por sigui e ocasionalmente.”

Sra. Tromp a duna di conoce cu Botica di Servicio ta brinda henter comunidad tur diasabra fin di luna un prikdag gratis na nan boticanan. E prikdag aki ta pa por midi nan nivel di sucu den sanger y pa midi presion di e pashent. Tambe por haya informacion pa esnan preocupa cu lo tin diabetes.

“Ta hopi importante pa nos tur join e lucha di conscientisacion contra e malesa aki pasobra pa nos e miho manera pa preveni e malesa ta pa medio di conscientisacion di comunidad.”

World Diabetes Day Walk a Thon di Imsan
Hilde Timmermans di Imsan a splica cu riba 12 di november Imsan hunto cu diferente sponsornan y tambe partnernan manera Ibisa y plataforma promocion di salud lo tene un walk & run di 5 kilometer den Carnaval Village. Tambe lo tin un tipo di ehercicio nobo cu ta similar na Zumba cu nan ta yama Dance Fitness.

E participantenan tambe lo competi pa e top 3 miho tempo pa completa e walk & run. Lo tin un top 3 pa hende homber y hende muhe, di cual e premionan lo ta 150 florin, 100 florin y 50 florin respectivamente. E muchanan tambe lo haya medayanan y chens pa gana premio. Durante e evento aki tambe lo ta posibel pa haci test di sanger pa determina nivelnan di sucu.

E evento lo tuma luga 4 or. Apart di esaki tambe lo tin un Kid’s run cu lo cuminsa 5 or, specialmente pa muchanan. 6 or lo tin e tayer di baile Dance Fitness y tambe lo ripiti esaki despues di mei ora.

Registracion pa e evento por wordo haci riba e website www.diabetesrunaruba.com. E prijs pa participa ta 10 florin pa mucha y 20 florin pa e walk & run. Pago por wordo haci online of personalmente na Ibisa.