POR – Union grandi di miembronan y candidatonan

Nos a drenta aña electoral 2017 y ya caba por mira algun partido preparando pa subi caya y campaña. Varios partido ta cla y a cuminsa caba mientras cu otronan ta den nan ultimo fase di preparacion. Nos a acerca e diferente partidonan cu ta bayendo eleccion y lo ta siguiendo nan pasonan durante e proceso electoral compartiendo cada desaroyo cu presenta.  Segun e desaroyo di eleccion, nos lo bini cu entrevistanan bayendo mas profundo den e vision di cada partido. Den e manera aki abo como votador por keda informa y tin un bista mas amplio pa yuda bo cu bo decision di voto.  Awe nos ta continua cu Pueblo Orguyoso y Respeta.

POR – Union grandi di miembronan y candidatonan
Otmar Oduber, lider di e plataforma ‘E Forsa Nobo’ ta conta nos cu tin hopi bon ambiente te aworakinan pa locual ta e prome eventonan di campaña.
Siman pasa for di trempan nan tabata riba caminda di Pavia na Paradera. Na locual ta conoci manera e Centro di POR, a organisa un evento di Bbq pa loke ta trata recaudacion di fondo, cual ta parti integral di un campaña. Por a mira partimento di sticker y varios auto cu tabata para boluntariamente pa bay tuma nan sticker di e Forsa Nobo. “Mi ta hopi satisfecho tambe den e manera con pueblo ta ricibi nos den nan hogarnan. Bishitanan ta tumando luga practicamente tur dia,” Otmar ta bisa.

Programa
Otmar ta conta nos cu e preparacion pa loke ta trata e programa di e partido ta tuma luga internamente. Otmar: “Nos a combersa caba cu varios instancia na Aruba, cu diferente ‘focus groups’ cu a wordo organisa, sindicatonan y gremionan comercial. Kiermen cu bo ta haya un bista di un forma diferente di traha bo programa. Un “Bottom Up Approach” caminda cu nos ta bay scucha for di pueblo kico nan kier pa ta den e programa.”  Segun Otmar, un cos cu bo por mira hopi cla ta cu ‘E Forsa Nobo’ a pone hopi atencion cu e pueblo, e persona kier ta prome na e momentonan aki. “A wak hopi proyecto y cosnan grandi tuma luga, pero e persona como ciudadano no a bay dilanti. Den su cas, den su frigidaire, bo ta wak cu gastonan a subi y nan kier mira un alivio pa biba naturalmente den un forma mas facil y mas comodo.”

Proceso di union ta formando
Sr. Andin Bikker, cu tambe ta formando parti di “E forsa Nobo” aworaki, ta conta nos cu esaki ta su di cinco campaña cu el a bay. Andin: ” E proceso di union ta formando y mi ta wak un recepcion den pueblo enorme. E ta duna bo un aliento y forsa nobo. Nos ta concentrando aworakinan pa tur e puntonan cu nos tin pa loke ta trata nos programa di gobernacion 2017/2021 y presenta esaki na pueblo.” E ta sigui bisa nos cu den e proximo simannan nos dilanti nan ta bay caba di rond af tur e reunionnan cu nan tin pendiente cu diferente personanan y institucionnan pa loke ta trata e “Bottom Up Approach”. Andin ta sigui bisa: “Door cu nos ta bay den pueblo y consulta cu nan na kico ta e puntonan specifico cu nan kier wak den e proximo gobernacion, bo ta mira e ora cu pueblo por indentifica su mes cu e forsa nobo. Pasobra nan sa cu no ta un hende ta sinta den airco anto traha un programa di partido, pero cu nos ta echt bay den pueblo.” E parti di criminalidad y inseguridad di pueblo ta loke ta un di e puntonan grandi cu e partido aki ta para pe como tambe riba e tema di salud. Andin: “E confiansa y nivel di cuido cu e pueblo kier mira pa loke ta trata nos salubridad, dokternan, Azv etc. Como tambe e aspecto pa loke ta trata nos enseñansa y asina nos tin diferente nivel di preocupacion cu pueblo kier nos adresa.”

Video di entrevista cu sr. Otmar Oduber & Andin Bikker