Lider di partido POR, Otmar Oduber hunto cu su colega Andin Bikker a elabora riba puntonan cu ta forma parti di e programa di gobernacion cu nan partido hunto cu e demas otro partidonan di e coalicion (MEP y RED) ta bay ehecuta den e periodo di gobernacion nobo.

Encuanto e fase nobo y final di reparticion di cartera y esunnan cu ta bira minister, sr. Oduber no a bay specificamente riba dje. Sinembargo el a laga sa cu nan tin cierto prioridadnan cu nan kier carga a base di nan programa di partido, esta Vision 17-21 Hunto Nos Por.

Den eleccion nan a pone tres pa cuater prioridad: Husticia, Aspecto Economico, Bienestar di comunidad di Salubridad y Aspecto humano relaciona cu vivienda, infrastructura y calidad di bida di e hendenan den e barionan. Riba e prioridadnan aki nan a papia di dje durante e conferencia di prensa cu a tuma luga den nan sede na Dakota. Diferente puntonan cu tin di haber basicamente cu husticia, economia y aspecto social, nan a trece dilanti di e programa di gobernacion como proposicion y/of parti di e condicion di e coalicion aki.

Tambe e aspecto di medio ambiente cu sr. Oduber ta haya cu ta bay den man cu e aspecto economico. Pero di nan tur, husticia tabata e prioridad di e comunidad di Aruba den tur consulta cu nan a haci, el a bisa.

Igualmente el a laga sa cu como partido cu ta forma parti di e discusion den un coalicion nan a bay cu nan puntonan di salida pa loke ta e asunto di aspiracion di cierto carteranan. E tin cu bisa cu e proceso aki ta tumando luga cu hopi respet y atencion. Cada partido ta presenta e candidatonan cu ta bay bira minister segun e carteranan cu e partido tin como punto di salida. El a indica cu cada partido di e coalicion aki a papia di 7 minister. Encuanto e candidatonan potencial di POR pa bira minister, sr. Oduber ta haya cu ta mas den su luga pa laga cu e proceso aki por termina debidamente.

El a reitera cu POR a pone e hendenan mas prepara y capacita pa asumi e responsabilidad di minister. El a indica cu ta obvio cu su persona y su colega sr. Bikker ta e candidatonan den prome linea pa bira minister. Algo cu Bon Dia a publica ayera unda e indicacion fuerte ta cu sr. Bikker lo haya e cartera di Husticia. Esaki den caso cu POR ta wordo honra cu nan punto di salida pa tin dos minister den e gabinete nobo. Pero tin mas candidatonan cu POR a manda pa por haci screening riba nan tambe. Esaki tambe ta conta pa nan miembronan den parlamento.

Den caso cu POR ta haya dos minister, Joselyn Barroso-Croes, como candidato number 4 lo tin cu drenta parlamento. Sinembargo respetando e protocol di nan partido cu esun cu tin mas voto ta esun cu ta bay parlamento, Alan Howell lo ta e persona cu mas cantidad di voto cu lo drenta parlamento di Aruba y no sra. Barroso-Croes. Asina mes nos redaccion a haya indicacion cu sra. Barroso-Croes ta candidato pa bira minister plenipotenciario na Washington.

Ex minister di turismo, Otmar Oduber a bisa cu niun hende ta mara na ningun cartera, “ya cu niun hende no a nace cu ne…” Aunke e ta reconoce cu su amor ta grandi pa turismo, y tambe e estudio cu e tin riba e tereno aki. Sinembargo den e coalicion di gobierno cu a wordo forma e no ta kere cu e ta e unico candidato pa bira minister cu por maneha e cartera di turismo. E ta kere cu ta existi un bon team y tambe tin hende cu tin e capacidad pa maneha nos turismo. “Ken ta asumi e responsabilidad den e gobierno nobo naturalmente nos lo ta cerca tambe pa por duna e sosten necesario na pensamento nan nobo”, el a bisa.

Cartera di husticia ta un deseo

Di su banda sr. Bikker a bisa cu deseonan semper tin pa bira minister di e proximo gobierno di coalicion, ya cu nan ta prepara pa sirbi nos pais den cualkier tereno. El a expresa tambe cu un di nan deseo ta esun di haya e ministerio di Husticia, pero el a laga sa cu den “todo caso e ta algo di deliberacion”. E ta spera cu proximamente nos por haya claridad hunto cu nan partnernan den gobernacion (MEP y RED) riba kende lo asumi e cartera aki.

Sinembargo e ta haya cu despues cu nan a elabora y bin cla cu e programa di gobernacion, esaki ta un acuerdo cu ta determina e rumbo di e gobernacion nobo. “E ta un acuerdo cu no obstante ken ta haya cual cartera, na final di dia esaki ta un acuerdo di gobernacion. Y segun esaki nos ta bay implementa den e bienestar general di nos pais”, el a declara.

E politico y hurista aki cu a yega di participa den 5 eleccion a subraya riba e importancia di e programa di gobernacion cu ta condensa den un documento di algo mas cu 40 pagina y cual weso di lomba ta bon gobernacion, integridad y transparencia. Pa medio di e documento aki specificamente pueblo por sa kico e gobernacion ta bay nifica pe den cosnan concreto, el a bisa.

Segun sr. Bikker den ultimo 24 aña Aruba no a conoce un coalicion y den tur eleccionnan cu el a yega di participa, esaki ta e prome biaha cu e ta experiencia cu concretamente e partidonan den coalicion a bay cu nan programa di gobernacion cu ta visibel. Tambe el a laga sa cu den nan caso POR a consulta ampliamente di antemano prome cu eleccion kico ta e preocupacionnan di pueblo di Aruba pa asina por yega na nan vision di 17-21. Pero awor e programa di gobierno cu nan por a concipia ta bira nan bijbel den cuadro di e gobierno nobo.