Ayera 10 di november ta tuma luga na Den Haag den Corte di Casacion e tratamento oral di e casonan di Aruba y Corsou tocante e apertura di matrimonio pa parehanan di mesun sexo. Pa Aruba ta trata di e caso di Fundacion Orguyo contra Pais Aruba y pa Corsou e caso ta di Human Rights Caribbean Foundation c.s. contra Pais Corsou.
Papiando pa Gobierno di Aruba, mr. Jan Paul Heering principalmente a presenta obhecionnan legal formal, enfatisando cu e huesnan di Corte incorectamente a asumi e rol di legislador. Representando Corsou, mr. Jeroen van Weerden a argumenta cu Corte no a scucha oponentenan di matrimonio di mesun sexo, y no a considera interesnan.
Mr. Mirto Murray, mr. David Wever y mr. Ton Vermeulen, representando gruponan defensor di derechonan LGBTQI+ a traves di Human Rights Caribbean Foundation y Fundacion Orguyo Aruba, a argumenta cu tin “discriminacion sistematico” di gobiernonan di Corsou y Aruba, haciendo parehanan di mesun sexo “ciudadanonan di segunda clase” sin e mesun derechonan cu parehanan casa, segun a reporta CuraçaoChronicle.
Awo e partidonan ta bay tin e oportunidad di responde por escrito riba e argumentonan di cada un. Procurador General Snijders ta spera di publica su conclusionnan dia 19 di januari, y despues di esaki, e veredicto final lo yega dentro di un par di luna. “Nos mester tuma un decision dificil riba un asunto hopi compleho,” presidente mr. Polak a indica na fin di e sesion.
