Por spera hopi awa: 25 pa mas cu 70 mm

National Hurricane Center a saca su ultimo noticia ayera nochi rond di 11’or, indicando cu e tormenta tropical Matthew ta 665 km leu for di Corsou. E ta birando mas fuerte y segun nan por bira un horcan di diahuebs anochi pa diabierna.

Awor e forsa di biento maximo ta 100 km pa ora pero nan ta birando mas fuerte. Nan a midi biento di 295 km panort y oost di e wowo di e tormenta. Segun e ultimo noticia di nos Meteo, e tormenta lo pasa panort di Aruba den oranan di diabierna marduga. Esey kiermen cu e distancia di e tormenta aki ta basta cerca di Aruba, cual ta haci cu ta necesario pa saca un Tropical Storm Watch, segun Meteo. Maske cu tur e parti di biento fuerte casi sigur ta keda panort di Aruba, asina mes nan ta pone un Watch, pa motibo cu hopi biaha por tin e probabilidad cu e por move un tiki pazuid.

Yobida

E pronostico di ta indica cu e proximo oranan bayendo diahuebs pa diabierna, ta mustra cu e aire ta bira mas humedo y instabil y esey ta duna nos chens pa algun yobidanan de bes en cuando cu lamper y strena. Segun Meteo e cantidad por core entre 10 mm te cu 40 mm pa dia. Pero e National Hurricane Center ta indica cu lo por spera mas: entre 25 pa mas cu 70 mm.

Di dos parti c Meteo Aruba a indica ayera tardi, ta cu e biento lo bay cambia di direccion ora e ta moviendo mas cerca di nos. Ta anticipa cu mas parti diabierna principalmente ta bay sinti mas biento for di west, anto e ora esey ta haci e lama mas bruto.

Lama

Meteo Aruba tambe ta spera un lama bruto. Pa motibo di esey nan a saca un comunicado pa tur e doñonan di boto chikito. Specialmente pa e zona protegi, cual ta banda di hotelnan grandi parti panort di Aruba. Nan ta avisa doñonan di boto chikito pa tuma precaucion y protege nan botonan, ya cu lama por boltia.