Actualmente screening di ministernan ta tuma luga mediante e Landsbesluit di 9 di september 2013, no. 1. E decreto tin su limitacionnan, pero e screening tambe por tuma luga durante un periodo di gobernacion y no solamente prome cu forma un gobierno nobo, algo cu den pasado recien no a yega di tuma luga. Formador Evelyn Wever-Croes tin como meta pa laga screening tuma luga mas frecuentemente, durante funcionamento di un minister.

Den cuadro di formacion di Gabinete Wever-Croes II, formador a combersa cu procurador general Bote Ter Stege tocante e screening di ministernan. Ayera den un conferencia di prensa, formador Wever-Croes a indica cu e Landsbesluit actual tin su limitacionnan, y esey ta un di e rasonnan dicon a combersa cu PG tocante e topico aki.

Den conferencia formador a menciona cu e screening tin varios componente, cual ta inclui un screening penal, un screening fiscal (impuesto), screening di tur funcionnan y actividadnan di e persona y su famia te na di tres grado, screening relaciona cu seguridad nacional y tambe posibelmente si ta necesario un screening medico. Esaki ta regla den articulo 2 di e Landsbesluit. Banda di esey e (candidato) minister mester raporta tur su funcionnan paga y no paga y tur interes financiero y comercial na e formado of e prome minister y tambe esunnan di su famia te na e di tres grado. Esakinan ta regla den articulonan 3 y 4.

Screening penal ta limita na casonan cu a yega na condena

Formador y actual prome minister demisionario sinembargo a menciona cu e screening tin su limitacion pa loke ta trata e investigacion penal. E manera con e articulo 2, inciso 1, sub a ta skirbi, ta intencionalmente limita na casonan penal unda e persona tabata envolvi, cual a yega na un condena. Pues di e manera aki no tin espacio pa uza informacion di un investigacion actual cu no a yega na un condena ainda. “Procurador general basa riba e Landsbesluit actual, no por bisa ora un persona ta bou investigacion cu e persona tin un record criminal. Pero esey ta un elemento hopi importante den un screening”, Wever-Croes a comenta.

Screening ta limita na famia te na di 3 grado, no ta inclui conocir

Ademas di e screening penal, un otro elemento di e screening ta limita, esta e screening di e funcionnan di e (candidato) minister su famia. E screening ta limita na e (candidato) minister su famia te na e di 3 grado. Riba e comentario cu e ta posibel e ora ey pa un (candidato) minister beneficia un persona conocir, cu no ta famia, formador a reacciona bisando: “e screening ta tuma luga prome cu e persona bira minister. Algo asina solamente lo bin den screening si e persona tabata minister caba. Un hende cu ta bira minister pa prome biaha, esey no ta bay hunga un rol.”

Sinembargo, no t’asina cu screening mester tuma luga prome cu un persona bira minister, pasobra den mesun rosea formador a admiti cu e ta posibel a base di e Landsbesluit actual pa screen durante un minister su funcionamento. Ademas, ta posibel cu un persona tin relacionnan laboral of comercial cu cierto personanan of conocirnan sin cu e personanan ey ta envolvi extensamente den un screening, mientras cu un persona asina por wordo beneficia durante e funcionamento di un minister. Pues dicon no ta amplia e aspecto aki di e screeing no ta cla.

Wever-Croes a expresa cu e ta un meta di dje pa por haci screening mas frecuente durante e periodo cu un minister ta funciona. “Y no necesariamente bo ta yega na un conclusion cu tin fraude of corupcion, pero si bo yega na indicacion cu tin cos straño, bo ta papia cu e persona y bo ta yega na palabracionnan nobo”, formado a splica.

Na final di screening e candidato ta dicidi cu formador con ta evita conflicto di interes

Loke no ta wordo menciona hopi frecuentemente ta kico exactamente ta encera e screening. Manera menciona, tin un cantidad di informacion cu e formador ta haya, pero kico ta pasa despues? Articulo 3, inciso 2 y articulo 4, inciso 2 ta indica cu e candidato (minister) ta dicidi den deliberacion cu formador tocante cua medidanan mester tuma pa preveni cualkier riesgo di posibel conflicto di interes y cualkier apariencia di prehuicio den toma di decision.

Pues screening di ministernan ta encera hopi entregamento di documento, y finalmente e ta yega na un combersacion y decision mutuo con pa preveni conflicto di interes. Pues ta keda na formador pa tuma un decision corecto, aunke formador mester comparti tur e resultadonan di e investigacion cu gobernador y tene un combersacion cune.

Investigacion di seguridad nacional nobo solamente si tin indicacion serio contra integridad

Un ultimo aspecto interesante di e screening, ta e componente di seguridad nacional. Esaki ta regla den articulo 2 inciso b. E Landsbesluit ta bisa cu e hefe di e departamento di seguridad nacional, Veiligheidsdienst Aruba (VDA) ta busca den e registronan di VDA si tin informacion cu ta menciona e (candidato) minister. Un investigacion mas intensivo nobo solamente ta necesario si tin indicacion serio cu e persona ta forma un peliger pa seguridad nacional, e estado di derecho, e integridad di e gobierno of otro interes di seguridad nacional di Aruba of Reino Hulandes.

Actualmente tin un propuesta di ley cu lo bay regla e screening di ministernan cu te ainda parlamento di Aruba no a pasa. Esaki lo bay tuma e luga di e Landsbesluit.