Manera nos a informa diasabra pasa, partidonan cu no tin asiento den parlamento mester reuni 578 firma di simpatisantenan pa por participa den e eleccion segun ley. (Kiesverordening). E total despues di e prome dia di e procedura aki (7 di aug): POR tin 578, e cantidad necesario. PPA/UPP tin 131. RAIZ tin 196. CURPA tin 78. ABO tin 20. RED tin 289 y finalmente MAS tin 44.

E periodo pa por recauda firma ta core te cu 15 di augustus. Durante e periodo e localidad situa na LG Smith Boulevard (unda por bay cita di paspoort) ta habri pa publico.

Ora nos a pasa, nos a mira cu e partido POR a conclui nan sesion y tabata e prome partido cu a logra haya suficiente sosten pa por participa na eleccion 2017. Segun e partido nan a yega e total di 578 firma den un periodo di 6 ora y mey.

RED: hende tabata un poco intimida

Lider di partido RED Ricardo Croes a bisa nos ayera: “Nos a desea pa e por a bay cu mas fluidez. E awasero y e prome dia di siman a haci cu e no a bay na manera optimo.”

Sr. Croes ta splica cu por ripara un diferencia entre partido POR cu ta un partido nobo pero relativamente grandi y e partidonan relativamente chikito. “E manera con POR a bin cu henter un makinaria ta similar na e partidonan tradicional, y ora cu nan a bay nos di e otro partidonan a keda pa sigui ricibi hende.”

E ta expresa cu e no ta di acuerdo cu e manera con e personanan cu ta bay firma ta wordo exponi. “Tur hende sa pa ken bo ta bin firma y esey mi ta kere mester cambia den e ley. No mester ta asina cu na cada loket tin nomber di un partido. Mester ta asina cu tur e loketnan t’ey y por firma na tur loket. E persona tras di e loket so lo mester haya sa ken bo a bin sostene.”

Segun sr. Croes, ‘te hasta nos a nota cu varios hende a bin y tabata poco intimida. Tin di nan cu a hasta expresa di a ricibi placa pa bin firma pa un partido. Mi ta haya cu mescos tin e secresia di un voto mester tin secresia pa mustra sosten pa un partido’.

Hefe di Censo Sharin Luydens ta clarifica cu segun e ley ‘ta papia di secresia di e voto, no secresia di apoyo’.

CURPA: partidonan a colabora bon cu otro

Nos a acerca lider di partido CURPA Christina Lampe pa duna su comentario. “Di mi banda mi a spera cu nos partido lo a haya tur e firmanan den un dia. Pa asina nos dedica nos mes na e campaña mes. Pero nos ta un partido nobo y esey ta bin cu su dificultadnan.”

Segun sra. Lampe, e no por a nota cu tabata tin algun problema pa cu e hecho cu por reconoce ken ta sostene durante e proceso. “Tabatin hopi hende si y e luga ta hopi chikito, pero sigur mi ta haya cu cosnan a bay hopi bon. E tabata bon coordina. Nos por a nota cu tambe e otro partidonan no a stroba di ningun manera, te hasta mi por bisa cu nos a colabora bon entre otro.”

UPP: procedura ta bay hopi slow

Lider di partido UPP riba lista combina PPA/UPP Booshi Wever a compara e procedura cu esun di e ultimo eleccion. “E ta bayendo basta slow, biaha pasa esaki a bay hopi mas lihe. Biaha pasa tambe tabata hopi mas keto, awe nos a haya hopi buya.”

Ora ta trata di e proceso pa recauda sosten pa partidonan sr. Wever ta expresa cu e ta haya cu lo ta bon pa keda cu e tipo di ‘drempel’ aki. “Pero no necesariamente mester pone e rij unda cada partido ta, por pone te hasta 10 loket y cada loket ta anonimo. E ambtenaar so lo mester haya sa, mi ta haya. Aworaki tin un borchi cu ta bisa cu bo ta firma pa tal partido ora ta para den rij y esaki mi no ta haya corecto.”

MAS: mester mas privacidad

Lider Holmo Henriquez di partido MAS ta expresa cu lo por ta posibel cu cierto personanan por wordo influencia pa e manera cu ta visibel pa cua partido nan a bay sostene. “Mi ta haya e mester ta mas priva pa por cuida e privacidad di e ciudadanonan.”