(EFE) – Ayera diaranson, por lo menos cuatro mucha a muri y otro tres a resulta herido den un atake cu a wordo cometi na un crèche na ciudad Blumenau, sur di Brazil, segun Cuerpo di Bombero a informa.
Un homber di 25 aña a drenta na e crèche Cantinho Bom Pastor cu un arma blanco y el a ataca e muchanan, y despues el a entrega su mes na autoridadnan, di acuerdo cu loke Polis Militar a bisa na medionan local.
E atake aki ta produci dies dia despues di otro cu a tuma luga na un scol di Sao Paulo, na unda un mucha di 13 aña a hinca y mata un juffrouw y a laga herido otro cuatro persona.
E agresion nobo aki a sucede den oranan di mainta, varios unidad di bombero y Polis a yega na e luga di atake pa atende e emergencia.
“A wordo confirma cu cuatro mucha a muri y tres a wordo hiba na hospital,” Cuerpo di Bombero a indica y tambe a agrega cu “otro organonan di siguridad publico” tambe ta actuando den e zona pa investiga e episodio aki.
Te ayera, no tabata conoci estado di salud di e muchanan herido, aunke prensa local a señala cu tin por lo menos un mucha cu ta den estado critico grave.
Den ultimo lunanan, a bin ripitiendo agresionnan similar na otro centronan educativo di Brazil, un pais cu te hasta un tempo pasa no tabata custuma cu e actonan violento aki.
Di su parti, presidente di Brazil Luis Inacio Lula da Silva a califica di “monstruoso” e asesinato di cuatro mucha ayera diaranson na un crèche di ciudad Blumenau.
“No tin mayor dolor cu di un famia ora ta perde un yiu of un nieto, ainda mas den un acto di violencia contra muchanan inocente y indefenso,” e mandatario a skirbi riba su rednan social.
