Talbes accion internacional via internet?
Despues di diferente caso cu a capta atencion, manera ceramento di Aura Casino, bancarota exigi di Tiara Air, e clausura repentino di Señor Frog’s tabata un otro sorpresa desagradabel. Y no solamente pa e trahadonan cu lo mester bay busca otro empleo, pero pa hopi hende cu ta puntra nan mes si no tin miho manera pa proteha trahado contra e tipo di suceso aki. E contesta ta lamentablemente “dificil”, y tin su motibonan.
Den e sistema legal cu nos ta funciona aden, ta facil y completamente legitimo pa un compania tene su resultadonan empresarial bon scondi, te na ultimo, manera den e caso di Señor Frogs, unda manera ladron den anochi a cera e luga, bay cu tur cos y keda sin paga e trahadonan. Contra e accion mes di cera e luga, e trahadonan no por haci nada, esey ta keda e decision di e doño di e empresa. Ta keda e forma con pa haya algun forma di compensacion pa e empleadonan. Den e caso aki ta obvio cu no tabatin ningun intencion di regla, mucho menos paga algo na e trahadonan. Si no ta pa accion di e trahadonan mes cu a acudi na autoridadnan cu a impedi pa e persona en cuestion sali for di Aruba, absolutamente lo por a logra.
Pero ta surgi un par di pregunta interesante, cu ta bon pa e abogado di e compania contesta: e persona cu a bin cera e luga, no ta oficialmente inscribi na Aruba den ningun posicion di e compania. E unico persona cu ta registra oficialmente na Registro Comercial na Aruba como director ta Omar Licon Schmitt, di nacionalidad Mexicano, y tabata varios aña trahado di Jobem NV na Aruba. Unda e persona aki ta awor? Pasobra ta e mester a duna cara y cuenta, como unico persona cu ta representa e persona legal na Aruba. Pakico e no a actua? E ta na Aruba y si no, cuanto tempo e ta afo caba? Pasobra si e ta afo mas cu un aña caba, esey lo significa cu a laga e compania conscientemente sin director legal… Lo ta interesante pa sa di e abogado di e compania aki na Aruba ta ken a contrata su persona y ta na nomber di ken e ta papia, pasobra e unico persona cu por a autoris’e ta Omar Licon. E accionista di Jobem NV, cu ta e Grupo Anderson di Mexico, no por autorisa un persona pa papia na nomber di e persona legal na Aruba.
Pa loke ta e persona cu a bin cera e luga ta surgi e pregunta interesante si e ta trahado di Jobem, of di Grupo Anderson, of e ta bin brinda servicio na Jobem NV of Grupo Anderson? Si e ta trahado, anto e mester di un permiso pa traha. E tin? Tambe mester investiga si e persona por ser poni responsabel pa actonan castigabel, mirando e hecho cu e tabatin e intencion di bandona Aruba sin paga debe cu Servicio di Impuesto. Ta p’esey tambe, cu e pregunta ta importante, si ta berdad cu a duna garantia na Servicio di Impuesto cu lo paga, ta ken a duna e garantia, Jobem NV na Aruba, of Grupo Anderson na Mexico? Pakico e pregunta ta importante, ta pasobra si tin placa pa paga SIA, mester por tin placa pa paga trahado tambe. Sigur si ta Grupo Anderson a duna garantia, casi sigur pa scapa nan cara riba escenario internacional y pa e asunto no bira un scandal internacional.
Aki ta tambe unda tin oportunidad pa e trahadonan logra algo. Kico ta e caso? Grupo Anderson, un compania Mexicano estableci na 1963, a bira grandi den e tipo di establecimento di diversion nocturno manera Señor Frogs y Carlos N Charlie’s; na Mexico prome, y despues den Caribe (entre otro Aruba), Sur America, Spaña y finalmente a penetra na Merca tambe, cu varios establecimento na Miami, Myrtle Beach. Hawaii, Las Vegas y Orlando. Si bira conoci awor, cu e consorcio aki ta maneha e tipo di accion barbaro aki pa deshaci di nan responsabilidad pa cu trahadonan, esey lo por cay den hopi mal tera na Merca, pio den e ambiente politico di e momento aki, pasobra ta trata di un compania Mexicano… Djis imagina e pregunta riba internet: “Are they going to repeat this kind of criminal behavior on American soil, with American workers?” Nos a yega di mira mas ehemplo di accion similar cu ta haci cu awendia hopi compania grandi tin miedo pa cliente o empleado rabia subi internet.
Si esey no yuda y e compania ta insisti cu nan no ta paga, ta resta poco mas cu demanda bancarota, y facilita e trahadonan nan cesantia via banco di seguro social. Pero si tin un manera pa purba para e sorto di abuso aki, sigur di un cadena internacional pudiente, no mester laga ningun medio sin utilisa. Y si acaso e empleadonan logra algo, nan no ta logr’e pa nan so, pero e lo ta un señal ‘loud and clear’ na otronan cu no mester tolera e tipo di practica abominabel aki.
